19. 11. 2021: Мілан ҐАЙ: За рана, Палїнка, Ластївочкы (Стишкы)

Мілан Ґай

За рана

Выходить за рана

зубате сонечко,

высвічує зверьху

на наше селечко.

 

Выходить все высше

світить долинами,

огрївать суківскый хотарь

теплыма лучами.

 

Высушыть із травы

стрїбристу росу,

розплете пупавам

їх жовтеньку косу.

 

Вылетять мотылї,

вылїзуть павукы

і росы кропаї

высушыть із лукы.

 

Лїсы і долины

навколо грїє,

аж із того цїлый

воздух потеплїє.

 

Палїнка

Тілько лем нещастя

зробила, на світї

не єдну родину

розбила в жывотї.

 

Розвертать родины

не мать змілованя,

бо пияк пє веце

на невытриманя.

  

Неєдну недугу

зробила на світї,

плаче дома мамка

із нёв малы дїти.

 

Не мають покоя

про пиячка свого,

водни і по ночах,

до рана скорого.

 

Ластївочкы

Прилетїли ластївочкы

з краю далекого

і лїплять свої гнїздочка

од рана скорого.

 

Лїтають з болотом

з недалекой млакы,

горї над облаком

лїплять собі домкы.

 

А по куртiм часї

будуть в них сидїти,

жебы пришли на світ

їх маленькы дїти.

 

У гнїздї під стрїхов

чути щеботаня,

бо нянько із мамков

кормлять їх од рана.

 

Лїтають воздухом

і мушкы зберають,

і так в добрім дїлї

людём помагають.

 

(З приправлёваной книжкы Мілана Ґая – Правдива выповідь.)

Script logo