19. 1. 2021: Мадярьскый державный секретарь стрїтив ся з представителями польской і русиньской меншыны

В децембрї минувошого року были зачаты стрїчі представителїв народностных меншын в Мадярьску з Міклошом Шолтесом, державным секретарём з вопросів реліґійных і народностных звязків Канцеларії премєра Мадярьска.

8-го януара 2021-го року одбыли ся стрїчі з далшыма двома меншынами – польсков і русиньсков, за котру была на події участна Віра Ґіріц і Віктор Крамаренко (на фотоґрафії з державным секретарём). Інформовав о тім Міклош Шолтес на своїй сторінцї на сітї Facebook.

В тот день стрїтив ся наперед державный секретарь із Евов Маріёв Ронаіни Слабов, посланкынёв Поляків у мадярьскім парламентї, і Маріёв Фелфйолді, предсидательков Вседержавного польского самосправованя, з котрыма обговорили розвиток польской народноснтой меншыны у 2021-ім роцї.

„За нима пан державный секретарь стрїтив ся із выбраныма представителями – як говорив Ференц Ракоцій ІІ. – ‚найвірнїшого народа‘, Русинів, Віров Ґіріц, народнов посланкынёв Русинів у парламентї, і Віктором Крамаренком, председом Вседержавного русиньского самосправованя,“ пише ся на сторінцї Міклоша Шолтеса.

„Міклош Шолтес подяковав їм за поміч у реалізації будованя ґрекокатолицькой церькви в Дебрецинї і высловбив надію, же у септембрї уже довєдна будуть брати участь на русиньскім отпустї в обновленій ґрекокатолицькій церькви у Шаёвпалфолі,“ пише ся далше на офіціалнім сайтї

„Да благословить Господь Бог жыючіх в Мадярьску Поляків і Русинів,“ закінчів державный секретарь інформацію о стрїчі.

Петро МЕДВІДЬ, ЛЕМ.фм, языкова управа: ред. АРК в СР.