18. 9. 2021: Народностный округлый стіл без Русинів

Русины притім мають статус народностной меншыны в Закарпатьскій области Україны.

Як інформовало Закарпатьске краёве общество чеськой културы, 14-го септембра 2021-го року в конференчній салї ужгородьского Центра култур народностных меншын Закарпатя одбыв ся народностный округлый стіл.

Была то стрїча делеґації Державной службы Україны з етнополітікы і слободы совісти, котра была на навщіві Закарпатьской области, з лідрами обчаньскых орґанізацій ромской, словацькой і чеськой народностной меншыны.

На стрїчу Русинів не позвали

„Почас події были обговорены вопросы што до реалізації державной політікы в области меджіетнічных односин і охраны прав народностных меншын, захованя і розвитку самобытности, успокоїня їх културных, языковых і інформачных потреб,“ інформовало Закарпатьске краёве общество чеськой културы.

Дале ся мало бісїдовати і о розвитку етнічной самобытности народностных меншын, о зміцніню меджінародностного порозуміня, о языково-освітнїм дїяльства ці публічных актівностях здружінь, котры представлюють в Закарпатьскій области народностны меншыны.

На стрїчу не были позваны жадны представителї русиньской народностной меншыны. Як інформовало нашу редакцію неменоване жрідло, все, кедь ся такы події орґанізують, Русины покликаны не суть.

Хоць на цїлодержавній уровни Русины на Українї узнаны не суть, треба підкреслити, же Русины мають статус народностной меншыны в Закарпатьскій области. Тот статус быв схваленый Закрпатьсков областнов радов іщі у 2007-ім роцї. В области дїють русиньскы орґанізації, дїє там і Народна рада Русинів Закарпатя, до котрой складу векшына орґанізацій входить.

Є зато вопросом, чом державна інштітуція, котра має в назві етнополітіку і слободу совісти, не покликала на таку стрїчу і представителїв меншыны, яка была історічно маёрітным населїнём той области, і котра доднесь мусить боёвати за свій статус народностной меншыны на Українї. Права меншын суть притім ґарантованы україньсков конштітуціёов і далшыма меджінародныма договорами, котрых є Україна сіґнатарём.

Охранця прав меншын

Державна служба Україны з етнополітікы і слободы совісти є доста новым державным орґаном, котрый быв реґістрованый лем в марцї 2020-го року на основі рїшіня україньского кабінету міністрів з юна 2019-го року.

Дїятельство має быти прямоване на меджінародностны односины, реліґії і охрану прав народностных меншын на Українї. Притримовати ся при тій роботї має тота державна служба Конштітуції Україны і україньскых законів, наряджінь презідента ці рїшінь Верьховной рады Україны.

Петро МЕДВІДЬ, ЛЕМ.фм, ґрафічна і языкова управа: ред. АРК в СР. Жрідло фотоґрафії: Закарпатьске краёве общество чеськой културы.

Script logo