18. 9. 2018: Влада у Свіднику розділёвала грошы. Дали і на ансамбель Маковіця

У віторок ,18-го септембра 2018-го року, у Свіднику проходило выїздове засїданя влады Словацькой републікы під веджінём премєра Петра Пеллеґріні. Ішло о третє выїздове засїданя в містї під Дуклёв. Двараз, у 2009-ім і 2016-ім роцї там засїдав кабінет премєра Роберта Фіца. Словацька влада роздїлила почас засїданя 1,25 міліона евр. Іде о средства із бюджетовой резервы про окрес Свідник, котрый належыть меджі найменше розвинуты на Словакії, інформовала словацька державна пресова аґентура TASR.

 

250 тісяч навеце про Ґірлатівцї

Влада звычайно роздїлює міліон евр в рамках выїздовых засїдань. У Свіднику тоту суму підняли о 250 тісяч, котры мають іти місту Ґірлалтівцї.

Як повів премєр Пеллеґріні, пріматор Ґіралтовець інформовав владу, же з причіны маєтково-правных обставин ся не подарило в містї почас попереднїх років добудовати протиповоднёву охрану. Кедьже місто уж до той сістемы інвестовало великы грошы, дотації уж ішли і од влады, кабінет у Свіднику вырїшыв дати Ґірлатівцям далшых 250 тісяч на добудованя розробленого проєкту. Ґірлатівцїі, окрем того, здобыли фінанчны средства в сумі 143 тісяч евр на три далшы проєкты.

 

У Свіднику грошы і про Маковіцю

В окресї Свідник підуть з міліоновой резервы грошы, наприклад, про церькви, жебы могли зреконштруовати дакотры части свого маєтку.

„Самособов, не забыли сьме ани на фолклорный ансамбель, котрый нас привітав при приходї на засїданя влады, бо святковав округлый юбілей і заслужыть собі так само дотацію од влады на матеріално-технічне забезпечіня,“ повів по їднаню на пресконферецнії Пеллеґріні.

Бісїда є о фолклорнім ансамблї Маковіця, котрому влада придїлила 5 000 евр. „Лем в дїтячій части ансамблю має 150 малых діітей і за то му належыть велика вдяка, же малы дїти, молоду ґенрацію веде ку всокочіню нашых традіцій‟, доповнив премєр.

Найвекшым приїмателём буде місто Свідник, в котрім ся будуть, наприклад, реконштруовати пути. 34 тісяч евр влада схвалила на выбудованя дїтьского грища, суму 20 тісяч здобыв містный шпыталь на то, жебы могли купити ся новы постелї про пацьентів. На реконштруцкію своїх обєктів здобыли грошы і дакотры села реґіону.

 

В окресї уж выникли новы робочі місця

В окресї Свідник выникло од наштартованя акчного плану про найменше розвинуты окресы на Словакії з підпоров реґіоналной дотації і европскых штруктуралных фондів 638 робочіх місць. Подля слов словацького премєра є амбіціёв досягнути до 2020-го року чісло 1418.

Окрес Свідник, в котрім є много русиньскых сел, має теперь безробітность коло 12 процент, причім в цїлім Пряшівскім краю, де жыє найвеце Русинів на Словакії, є безробітность коло 9-ёх процент і середнє чісло безробітности в рамках цїлой Словакії є 5,47 процента.

Премєр у Свіднику інформовав, же влада роздумує і о можливій підпорї інвестора, котрый хоче прямо в містї реалізовати выробу куфрів і вытворити далшы робочі місця. Підпора державы бы в тім припадї могла быти в сумі 430 тісяч евр. Пеллеґріні видить потенціал і у свідньцкій фірмі, котра занимать ся выробов контайнеровых будов. Тота подля слов премєра пожадалиа владу о поміч при накупі новой тяжкой технікы. Актуално давать роботу веце як сто людям.

Пополідне мав каждый міністер напланованый свій проґрам у Свіднику. Премєр ся стрїтив із старостами выбраных сел окресу.

Петро МЕДВІДЬ, жрідло: лем.фм, жрідло фотоґрафії: TASR