18. 8. 2021: Буковскый їднав о двоязычности в реґіоналнім здравотництві

Уповномоченый бісїдовав з міністром і о вакціначній кампанї в меншыновых языках.

Уповномоченый влады Словацькой републікы про народностны меншыны Ласло Буковскый стрїтив ся у віторок, 17-го авґуста 2021-го року, з міністром здравотництва Владиміром Ленґварьскым. Інформовав о тім Уряд уповномоченого на своїм офіціалнім сайтї.

„Уряд уповномоченого влады СР про народностны меншыны уж при приготовлїню оцїнкы о хоснованю меншыновых языків, котра передкладать ся владї СР, зістив, же в области здравотництва суть великы недостаткы і треба ся заміряти на одстранїня тых проблем,“ пише ся на сайтї уряду.

Хоць парадоксно пандемія помогла просадити языковы права меншын, головно при публікованю основных інформацій і наряджінь, котры дотуляють ся хвороты Covid-19, уряд звертать увагу на то, же у додавателїв здравотницкой старостливости майже цалком бракує означінь, інформацій і написів про паціентів у меншыновых языках.

Главнов проблемов просаджованя двоязычности має подля уряду быти факт, же додавателї і зряджователї собі не усвідомлюють свої обовязкы, котры выходять із меншынового языкового закона.

„Дотулять ся то значной части пріватных здравотницькых заряджінь і заряджінь, котры належать під высшы теріторіалны цїлкы (крайску самосправу, позн. ред.),“ пише ся на сайтї уряду з тым, же цїлём стрїчі уповномоченого з міністром было найти сполочны пункты при просаджованю прав у тій области.

Ласло Буковскый привітав конштруктівну і меріторічну стрїчу з міністром Ленґварьскым, котрый приобіцяв інтензівну сполупрацу меджі Міністерством здравотництва Словацькой републікы і Буковского урядом на вакціначній кампанї в меншыновых языках. Так само ся доїднали, же в слїдуючіх місяцях приготовить ся зміна леґіслатівы і інштрукція, котра злегшать просаджіня меншыновых языковых прав у реґіоналнім здравотництві.

„Меншыновы языковы права в области здравотництва суть довгодобо мімо публічного інтересу і лем з часу на час приходять ініціатівы од обчанів. Моёв намагов є, жебы літера закона, котра бісїдує о обовязку публіковати вшыткы інформації о охранї жывота і здравя і в меншыновім языку, была дотримана. Не знам собі представити ідеалнїшу і важнїшу область, як є сектор здравотництва,“ повів Буковскый.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.