18. 7. 2023: В Пряшові одбыв ся архієпархіалный одпуст на праздник священомученика Павла Петра Ґойдіча

В Катедралнім соборї святого Йоана Крестителя в Пряшові одбыв ся в понедїлёк, 17-го юла 2023-го року, архієпархіалный одпуст з нагоды праздника блаженого священомученика Павла Петра Ґойдіча.

Як інформовав Михал Павлишіновіч з Інформачного центра Пряшівской архієпархії, в тім роцї одпуст быв у дусї рочніцї, бо минуло 135 років од народжіня блаженого Павла Петра, котрый народив ся у 1888-ім роцї в Руськых Пеклянах, де быв втогды його отець священиком на парохії.

Владыка установив нового архімандріту

Головным служытелём архієрейской літурґії в церьковнославяньскім языку быв владыка Мілан Лах, помічный єпіскоп Братїславской єпархії, з ним служыв владыка Петро Руснак, апостольскый адміністратор Пряшівской архієпархії а єдночасно братїславскый єпарха, і владыка Мілан Хаутур, емерітный кошіцькый єпарха. Участь брало понад 60 священиків і трьоми діаконы.

Проповідь мав протоіґумен василіянів на Словакії отець Юрій Седлачек, ЧСВВ, котрый приближыв жытя священомученика Павла Петра Ґойдіча. Окремо заміряв ся на період ёго священьской формації і період новіціату, котрый пережывав блаженый в монастырю на Чернечій Горї коло Мукачова.

На кінцю торжество продовжовало молебеном над мощами священомученика в бочній каплічцї катедралного собору.

В рамках Божеской літурґії быв установленый новый архімандріта в Пряшівскій архієпархії, котрым став отець Марко Дурлак. Тото менованя му удїлив владыка Петро Руснак за ёго довгорочны священьскы намагы і заслугы в службі Ґрекокатолицькій церькви на Словакії і в загранічу, но і як прояв вдякы за ёго вірность.

Новый архімандріта

Отець архімандріта Марко Дурлак народив ся у 1975-ім роцї в Левочі, рукоположеный на священика быв у 1999-ім роцї владыком Йоаном Гірком в Пряшові.

Послїднї рокы робить на Дікастерії про восточны церькви в Римі (передтым Конґреґація про восточны церькви). Служыв шпірітуалом в Боголовсвкій семінарії блаженого єпіскопа Павла Петра Ґойдіча в Пряшові, духовным в монастырю контемплатівных сестер редемпторісток восточного обряду у Воронові над Топлёв-Ломніцї, церемоніарём на Архієпіскопскім урядї в Пряшові, а в початках своёй духовной службы быв і на місії на Українї.

Почас навщівы Святішого Отця Франціска на Словакії у 2021-ім роцї старав ся о головны літурґічны приправы і комунікацію з папскыма церемоніарями перед і почас служіня історічно першой літурґії, котру на Словакії служыв Вселеньскый Архієрей.

Отець архімандріта має абсолвованы ліценціатны штудії патрістікы на Папскім патрістічнім інштітутї в Римі, наслїдно абсолвовав докторьскы теолоґічны штудії на Папскім восточнім інштітутї. Є автором веце фаховых статей публікованых на Словакії і в загранічу.

Петро МЕДВІДЬ, ЛЕМ.фм, языкова і ґрафічна управа: АРК в СР. Фотоґрафіi: Михал Палочко.