18. 7. 2018: Ґойдіч стане покровителём міста Пряшів

17-го юла 2018-го року припомянули сьме собі 130 років од народжіня ґрекокатолицького єпіскопа, русиньского родолюба, священомученика Павла Петра Ґойдіча, котрый умер в комуністічнім арештї в Леополдові.

 

Покровитель міста

Із той нагоды в суботу 21-го юла 2018 одбуде ся в Катедралнім соборі св. Іоана Крестителя в Пряшові архієпархіялный одпуст. Як інформовав Інформачный центер Пряшівской архієпархії, іде о єдну із річніць Юбілейного рока Пряшівской архієпархії, котрый є присвященый 200-му юбілею заснованя Пряшівской ґрекокатолицькой єпархії, котра оддїлила ся од Мукачова.

Як далше інформовав центер, одупст зачне в суботу Акафістом ку блаженому священомученикови П. П. Ґойдічови, по котрім буде о 10.00 год. слїдовати архієрейска літурґія, котру буде служыти Преосвященый владыка Йоан (Бабяк), пряшівскый архієпіскоп і метрополіта Словакії. Із той нагоды метропліта выголосить священомученика за покровителя міста Пряшів.

 

Павел Петро Ґойдіч

Блаженый священомученик Павел Петро Ґойдіч, ЧСВВ, народив ся в родинї ґрекокатолицького священика в Руськых Пеклянах коло Пряшова 17-го юла 1888-го року. По штудію в Пряшові і в Будапештї быв у 1911-ім роцї рукоположеный на священика і служыв на селах Пряшівщіны. У 1922-ім роцї вступив до Чіну св. Василія Великого (Василіяны) і став членом Мукачівского монастыря св. Николая на Чернечій горі. У 1927-ім роцї быв у Римі рукоположеный на єпіскопа і менованый за адміністратора Пряшівской ґрекокатолицькой єпархії. Од 1940-го року діяв як єпархіялный єпіскоп у Пряшові. У 1950-ім роцї быв у выконштруованім політічнім монстерпроцесї обвиненый і одсудженый на дожывотный арешт і далшы кары. Вмер в леополдовскім арештї 17-го юла 1960-го року. 4-го новембра 2001-го року быв у Римі папом римскым Іоаном Павлом ІІ. выголошеный за блаженого. Ёго мощі суть в бочній каплічці пряшіского катедралного собору.

Священомученик Павел Петро Ґойдіч быв великым русиньскым родолюбом і будителём. В 1930-ых роках основав русиньску ґімназію в Пряшові, котру довтогды Русины із Пряшівщіны не мали. Перед списованём населїня апеловав на Русинів, жебы ся не писали нияк іншак, лем як Русины, бо так нас назвав отець Духновіч.

Ґойдіч быв знамый і як єпіскоп золотого сердця, што проявлёвало ся наприклад тым, же основав і церьковный сиротинець, ці тым, же быв єдиным католицькым єпіскопом у фашістічнім Словацькім штатї, котрый в одкрытім писмі апеловав на презідента Тіса, жебы ся будь зрік свого священства, або резіґновав із функції презідента. Крітізовав протижыдївску політіку фашістічного штату, апеловав на своїх вірників, жебы помагали тым, проти котрых діє ся несправедливость і сам скрывав людей жыдївского походжіня перед транспортами. 27-го януара 2008-го року му быв удїленый тітул Справедливый меджі народами in memoriam за спасіня жывотів многых жыдївскых жытелїв і ёго одкрыты протесты проти депортацій.

 

Юбілейный рік

Пряшівска ґрекокатолицька архієпархія рік 2018 выголосила за юбілейный. Окрем святкованя 200-го юбілею еріґованя єпархії і 130-ой річніцї народжіня блаженого Павла Петра Ґойдіча собі припоминать і далшы вызначны річніцї.

У 2018 роцї собі архієпархія припоминать 1155-ту річніцію приходу св. Кіріла і св. Мефодія на Велику Мораву, 50-ту річніцю обновлїня Ґрекокатолицькой церькви в бывшій Чехословакії, 30-ту річніцю выголошіня базилікы мінор в Лютинї, 20-ту річніцю выданя нового словацького перекладу літурґікона, 15-ту річніцю выголошіня за блаженого священомученика Василя Гопка, 10-ту річніцю зряджіня Пряшівской метрополітной церькви sui iuris на Словакії і піднятя Пряшівской єпархії на рівень архієпархії і так само 10-ый юбілей выголошіня горы Звір в Літмановій за путницьке місце.

П. Медвідь