18. 12. 2020: Піддукляньскый освітнїй центер має новы модерны просторы. Дома там будуть Маковіця і Маковічка

Ставебны роботы в Піддукляньскім освітнíм центрí у Свіднику завершыли ся. Як інформовала Леа Геілова з Оддїлїня комунікації і пропаґації Канцеларії председы Пряшівского самосправного краю (ПСК), реконштрукція і прибудована часть стояли 834 тісяч евр.

Роботы в Піддукляньскім освітнім центрі тырвали 2,5 рока. Зробив ся простор про фолклорны ансамблі, але і про выставкы ці творчі варштаты.

Нова танечна сала і кройовня

„До прибудованой новой безбарьєровой части будовы і часточной реконштрукції історічной будовы Піддукляньского освітнёго центра у Свіднику сьме проінвестовали понад 834 тісяч евр. Тїшыть ня, же сьме тым могли вытворити културный центер про таленты в двох реґіонах, окресу Свідник і Стропків, котры освітнїй центер покрывать. Фолклорный колектів Маковіця і Дітьскый фолклорный колектів Маковічка уж не будуть мусити мати пробы в арендованых просторах, але в цалком новій танечній салї під зряджователём – крайсков самосправов,“ конштатовав председа Пряшівского самосправного краю Мілан Маєрьскый.

В новій будові зробила ся танечна сала, шатнї, кроёвня, так само там суть і соціалны заряджіня, розложытельна трібуна ці вытяг. Окрем того, была зреконштруована історічна будова, котра є з новов перепоєна.

Піддукляньскый освітнїй центер у Свіднику своїм діятельством покрывать села і міста двох окресів – Свідника і Стропкова, в котрых жыє коло 63 тісяч жытелїв. Центер є і творцём а сполутворцём културных і освітнїх актівностей. Приготовлює і реалізує главно фестівалы, конкурзы, переглядкы, выставкы, творчі варштаты і далшы презентачны і освітнї події.

Маковіця і Маковіча

Ансамбель Маковіця належыть меджі найстаршы народностны колектівы на Словакії. Од свого выникнутя у 1956-ім роцї аж дотеперь репрезентує културу Русинів. Ёго зряджователём є Піддукляньскый освітнїй центер у Свіднику.

Ансамбель выступав на многых домашнїй подіях і фестівалах, но перешов і практічно цїлу Европу а часть Азії. Успіхы почас свого єствованя здобыв і на многых конкурзных переглядках. В роцї 2011 му была удїлена Цїна председы Пряшівского самосправного краю за выняткову презентацію народностной културы і вынятковы успіхы досягнены пошырёванём културной дїдовизны предків.

Дїтьскый ансамбель Маковічка выникнув у 1997-ім роцї, жебы приготовлёвати дїти про Маковіцю. Суть в нїм дїти од 7 до 14 років і так само належыть під освітнїй центер.

Петро МЕДВІДЬ, ЛЕМ.фм, языкова управа: ред. АРК в СР.