18. 12. 2019: Штефан Штец і його «вітор». Платня близка Лемкам

Русиньскій естрадный співак, Штефан Штец, перед даякым часом выпустил свою другу сольову платню. Подібні як при дебютантскым кружку, котрый явил ся ярю 2018 р., і тота платня такой выключно являт ся русиньском.

Што цікаве про нас – слухачів з Лемковины, Штец зас заспівал співанкы добрі нам знаны. Серед них нашло ся выконаня і авторской пісні Семана Мадзеляна, до котрой музику обробил Ярослав Трохановскій.

Звязаный з Лемковином

«Цедечко, котре єм выдал, має назву Дує вітор. Є там дуже співанок такых, котры мі ся барз люблят з того нашого русиньского боку, но так само і з лемківского боку, зато же і там мам коріня», бесідує про ЛЕМ.фм Штец.

Співак має почутя звязку з Лемковином, што підкрислял вельократно при презентациі свойой першой платні. Його дідо походил з єдного з лемківскых сел, а пристал до Габуры. Подібні як перша платня, котру назвал Полетів бы-м на край світа, друга приносит слухчам з Лемковины вельо музичной втіхы.

Як підчеркнул артиста, на платни нашли ся і співанкы од Русинів з Підкарпатской Руси. Прото сеса платня не заперла ся лем на прашівскым фольклорі. Чути можеме звукы близкы для вшыткых русиньскых земель. «На цедечку сут пісні, котры сме понаходили як раз на тамтых землях. Так што як бесідую, є то платня без границ медже Русинами. Находят ся на ній і дві словацкы співанкы» – продолжат.

Шыршый стиль

Штефан Штец назвал своє нове цедечко, котре представлял на недавным турне, Дує вітор. «Я си думам, же там чути і тот вітор, котрый сме принесли до нашой творчости, зато же є то кус інче цедечко як тото перше. Кус з того традицийного стилю перешли сме до того шыршого, world music. Сут там і єдны, і другы звукы, вшелеякы обробкы. Є то наша нова платня, з даякым такым вітром», констатує співак.

На платни находит ся 16 творів. Каждый з них єст при інтересуючій музичній аранжациі. Чути мож заєдно народны, але і авторскы співанкы. Єдном з них єст лемківска пісня Під облачком. То як раз она долгыма роками была розславляна нашым ансамбльом Лемковина з Білянкы.

Як сме не так давно інформували, Штец односит успіхы. Його дебютанстка платня належыт до найбарже продаваных на Словациі. Вчас турне зо свойом Файтом – капельом, котра і тепер награла з ним другу платню, одобрал двократну платинову платню за чысло проданых дисків.

Ціла платня є доступна до свобідного слуханя в сервісі YouTube. Найдете ю за залученым долов мотузком.

Севериян КОСОВСКЫЙ, ЛЕМ.фм

(Публіклуєме в оріґіналї – лемківскім варіантї русиньского языка.)