18. 12. 20189: Буковскый прoпоновав, жебы будуча влада робила на меншыновім законї

Інштітуціоналне посилнїня охраны прав народностных меншын, розшырїня прав хосновати меншыновый язык в уряднім контактї і зміна методікы навчаня словацького языка на школах з навчалным языком народностным меншын.

То лем дакотры із кроків і намірів, на котрых хоче в далшім періодї робити партія Most-Híd. Підпредесове Абел Равас (третїй злїва), Петро Крайняк  (другый злїва) і Аттіла Аґоч (першый справа) вєдно із номінантом своёй партії у функції уповномоченого влады Словацькой републікы про народностны меншыны Ласлом Буковскым (першый злїва) свої планы презентовали в понедїлёк, 16-го децембра 2019-го року, на стрїчі з медіями. Інформовала о тім аґентура TASR.

Хотять продовжовати в започатых проєктах

Підпедседа партії Most-Híd, котрый є єдночасно і уповномоченым влады Словацькой републікы про ромскы комуніты, Абел Равас (третїй злїва) на стрїічі повів, же в періодї, котрый кінчіть, ся їм подарило просадити веце кроків у области части меншыновых языків, школства, културы ці інклузії марґіналізованых комуніт і мають дяку продовжовати в започатых проєктах. Петро Крайняк, котрый є моментално на посадї державного секретаря Міністерства школства, наукы, дослїджіня і шпорту Словацькой републікы, підкреслив ключову роль якостной передпрімарной освіты, котра бы рефлектовала і потребы членів народностных меншын.  За ёго словами партія хоче ся занимати і можливостями зміны встановлїня кількости першых клас на середнїх школах. „Хочеме досягнути, жебы каждый член народностной меншына мав шансу дістати ся на школу з навчанём языка народностной меншыны, но при сучасній сістемі встановлёваня першых клас то не все можне,‟ повів Крайняк.

Обовязок про нову владу

Уповномоченый влады Словацькой републікы про народностны меншыны Ласло Буковскый говорив о приготовлёваню леґіслатівного заміру закона о народностных меншынах. „Нашым цілём є приготовити і схвалити дефінітівну верзію леґіслатівного заміру і обовязати будучу владу, жебы до проґрамового выголошіня і леґіслатівного плану дала приготовлїня параґрафовой верзії закона,“ цітує аґентура Буковского. Словацька републіка не має дотеперь приятый меншыновый закон, хоць з такым законом рахує і словацька конштітуція. О законї ся говорило і на новембровім засїданю Выбору про народностны меншыны і етнічны ґрупы з тым, же членове выбору підпорили філозофію леґіслатівного заміру. Якраз на слїдуюче засїданя меншынового выбору, котре буде проходити в януарї, хоче Буковскый принести пропозіцію, жебы ся схвалив обовязок про будучу владу односно того закона. На Словакії будуть 29-го фебруара 2020-го року проходити парламентны выборы, зато хоче Буковскый схвалити обовязок робити далше на законї іщі перед тым, як ся змінить сучасна влада, в котрій є і партія Most-Híd.

На урядї подля кількости хоснователїв языка

Аттіла Аґоч представив на стрїчі замір новелізації, котра бы не встановлёвала право хосновати язык народностной меншыны в уряднім контактї подля кількости членів народноснтой меншыны в селї або містії, але подля кількости поужывателїв. „Аплікачна практіка вказує, же даны о вжывню меншынового языка суть релевантнїшы“, повів Аґоч.

Петро МЕДВІДЬ, ЛЕМ.фм