18. 10.2020: Премєр: „В СР ся рихтує плошне тестованя жытелїв на новый коронавірус.‟

На Словакії ся рихтує плошне тестованя жытелїв країны в одношіню з хворотов КОВІД-19. Влада ся на проєкт приправує уж три тыжднї. Затля не є ясне, ці тестованя буде повинне або добровольне. В суботу, 17. октобра 2020, почас пресконференції то увів председа влады Іґор Матовіч (OĽANO).

Перетестованя жытелїв Словакії бы мало проходити такым істым сістемом, як при вольбах. У приблизно 5997 волебных раёнах вытворять ся одберовы місця. В каждім буде коло 7 людей, а то поліцайты, вояци, представителї містной штатной справы і здравотници, пояснив премєр. Люде бы мали на одберове місце прийти з обчаньсков леґітімаціёв.

Люде бы мали быти отестованы подля Матовіча почас двох вікендів. Матовіч твердить, же тестовати бы ся мало в часовых інтервалах подля абецедного порядку жытелїв. Мало бы ся так передыйти згромаждїню людей на єднім місцї „Тестованя буде безплатне,‟ додав.  

Тестовати ся буде за помочі антіґеновых тестів, котрых штатны громадны резервы обїднали 13 міліопнів фалатків. Антіґеновы тесты захоплять інфекчных людей, підкреслив председа влады.

Здрой: Портал Уряду влады СР.
 

Script logo