18. 10. 2019: Юрко ХАРИТУН: Стишкы
ПОРОЖНЄ ГОРНЯ
Ты была чаша
повна вина
Од жажды хтось выпив
тебе до дна
Менї остало
малёване
але порожнє горня
ДАКОЛИ
Думкы лїтають як мотылї
як над Бескидом орлы
Лїзуть як по стїнї павукы
На душі огник
А коли іщі чую
співанку нашу
На сердцю ватра горить
ЗЕРНЯТКА
Стою під лїсков
Не падать додж
Орїшкы
Домів принесу
повны кешенї
Ростовчу
Зернятка положу
на долонь мамі
МОЇ СТИШКЫ НЕ ЛИСТКЫ
З вітром воюю
Отворю дверї
Як злодій із стола
краде папіря
мої стишкы
То не осїннї листкы
што легко однесе
і зробить постїльку собі
В лїсї може робити чуда
Стишкы руков прикрыю
а ту ёму не доволю.
ШТО ТРЕБА?
Віршы нерімованы
то як сорочкы небіґлёваны
Хто бы в погужваных ходив
Треба лем біґляз
Не будуть никому на сміх
ШТО ТРЕБА НА ЖАЛЇ?
Жалї не змякнуть
можуть кыпіти і цїлый день
Не будуть тлїти
Не будуть горіти
Не згниють як пень
Спід стрїхы їх выжень
а дверї замкни
ТАКА Є ЛЮБОВ
Любов
не може быти калюгов
Любов
то манна з неба
яку нам треба
Коли ты плачеш
терплю і я
Коли ты любиш
лїтать душа
х х х
Сонечко зотре
із квіток росу
Але не може
твою красу
Ани любов
коли я з тобов
ЖРІДЛО РІКЫ
Заведу тя там
де ты іщі не была
Де мы із дїдом
під Бескидом сідїли
коло жрідла Цірохы рікы
Таку мелодію сімфонію
не заглушать вітры
Подь її послухати і ты
МЕНЕ ТАМ ВЕДЕ СПІВАНКА
Танїры малёваны
Ложкы деревяны
і миска пирогів
На порозї мати чекала
як верну ся домів
І в ночі не біда
трафити до гнїзда
Там тя заведе і співанка
ПРАВДА ТАКА
Я не олімпіонік
і не атлет
Я поет
На шыї медайлы
златы
стрїберны не маю я
На столї за поезію
бронзового
карпатьского медвідя
І ТАКЫ СНИЮТЬ СЯ СНЫ
Не фаребны мої сны
Сниють ся чорны
сивы
блїды
страшны
Што робити?
І в ночі
мушу свічку запалити
Одлетять як пергачі
ЗІЛЯ
Мамо,
За нашов хыжов
былинкы росли
Вы їх сушыли
Зіля варили
Розбите колїно моє умыли
і не болїло
Теперь їх треба на мої раны
Сыну,
Верни ся назад до долины
акурат цвинуть
НА ПОРОЗЇ
Можуть трепати
і бити громы
З долины чую
все нашы дзвоны
Дванадцять годин
В такім часї мати на поріг
вынесе миску пирогів
І ТАК ЛЮБЛЮ
Метафоры
Рімы
Парады на стишках
Я так люблю
як тебе без лах
ВЫБЕРАМ І Я
До стишків выберам
любовны слова
Як до танцїв молодіцї
у куртенькых сукенках
То не грїх
колись без них
