18. 1. 2018: В Ужгородї одкрыли выставку Івана Манайла

В Закарпатьскім областнім художнїм музею ім. Йосифа Бокшая в Ужгородї святотчно одкрыли 12-го януара 2018-го року ретроспектівну выставку русиньского маляря Івана Манайла (1942 – 2010) під назвов Субєктівна реалность. Інформовав о тім портал Uzhgorod.in.

 

Выставку одкрыв директор музею Франциск Ерфан, котрый повів, же многы із участных на події знали Івана Манайла особно, як ініціатора заснованя памятного музейного будинку свого вітця Федора Манайла в Ужгородї. На одкрытю приговорив ся і ректор Закарпатьской академії умень Іван Небесник, котрый росповів, же із Іваном Манайлом знав ся од 1982-го року. Участна была і родина Івана Манайла, котра жыє в Мадярьску, включно сына Андрія, котрый є так само малярём.

Выставлёваных в Ужгородї творів Івана Манайла є коло 70. Суть міджі нима мальбы і ґрафікы, котры захоплюють вшыткы періоды творчости умелця. Многы творы суть выставелны по першый раз. Експозіцію Івана Манайла мож в Ужгородї відїти до 25-го януара.

Іван Манайло

 

Народив ся Іван Манайло 16-го януара 1942-го року в Ужогородї, в родинї знамого русиньского умелця Федора Манайла. Професійну освіту здобывав наперед в Ужгородьскім умелецько-промысловім учілищу, пізнїше штудовав на Києвскім умелецькім інштітутї.

В роках 1969 аж 1985 выв учітелём і директором (рр. 1972 аж 1985) Ужгородьского умелецько-промыслового учілища, умелцём Закарпатьского умелецького фонду, быв єдным із орґанізаторів, а єден час і головов Творчого зъєдиненя професіоналных умелцїв Закарпатя (укр.: Творче об’єднання професійних художників Закарпаття), робив манажера Меджінародной асіоціації „Інтерарт“.

 

По переселїню ся до Мадярьска в роцї 1998 залучів ся до діятельства русиньской самосправы в Мадярьску, вів актівне выставне діятельство. У 2009-ім роцї здобыв державне оцїнїня За заслугы у збогачіню світового уменя і вызначный вклад до укрїплїня русиньско-мадярьского приятельства.