17. 9. 2024: В Румунії стрїтили ся католицькы єпіскопи восточного обряду

Од 16-го до 19-го септембра 2024-го року проходить в румуньскім містї Орадеа XXV. стрїча восточных католицькых єпіскопів Европы. На стрїчі тот рік занимають ся темов плеканя братства меджі єпіскопом і священиками.

„Односины меджі єпіскопом і священиком – братство і людьскость. Сінод о сінодалности“, то офіціална назва темы, котру тот рік рїшають восточны католицькы єпіскопи в рамках своёй стрїчі, котра має шторічну традіцію. Стрїчу орґанізіє Рада єпіскопскых конференцій Европы, і тот рік єй гостить Орадейска єпархія Румуньской ґрекокатолицькой церькви.

Участный і префект Дікастерії про восточны церькви

Як на своїм порталї інформовала україньска редакція Radio Vaticana, проґрам почав ся в понедїлёк стрїчов єпіскопів з представителями містных властей, і обсягує лекції на дану тему, взаємне общаня і сполочну молитву.

Євхарістічны богослужіня в містнім катедралнім соборі і далшых двох храмах міста Орадеа мають поступно одслужыти владыка Віржіл Бечеа – орадейскый єпарха, Блаженійшый Святослав Шевчук – верьховный архієпіскоп києво-галичскый, і Высокопреосвященый Філіп Кочіш – гайдудороґскый архієпіскоп і митрополіта.

Почас пленарных засїдань выступити мають кардінал Клавдіо Ґуджеротті – префект Дікастерії про восточны церькви, філаделфскый митрополіта Україньской ґрекокатолицькой церькви владыка Борис Ґудзяк, ці владыка Мануіл Нін – єкзарха Апостосльского екзархату Ґреції.

Окрем Высокопреосвященого Філіпа Кочіша, котрый вже быв спомянутый, на стрїчі суть і далшы єпіскопи, котры репрезентують наслїдників русиньской традіції – Ужгородьской унії. Присутным є мукачовскый помічный єпіскоп Ніл Лущак, ніредьгазькый єпарха Авел Сочка, єпарха Єпархії Святого Николая в Руськім Керестурі Ґеорґій Джужар, архієпіскоп Кіріл Василь – кошыцькый єпарха ці владыка Мілан Лах – помічный братїславскый єпіскоп.

Новы єпіскопи на стрїчі в Римі

На шторочній стрїчі восточных єпіскопів Европы не беруть участь Высокопреосвященый Йона Максим, пряшівскый архієпіскоп і митрополіта, і владыка Теодор Мацапула, мукачовскый єпарха.

Тоты дві новы главы містных церьквей, котры были рукоположены на єпіскопів лем в тім роцї, ішли на тыжднёву стрїчу новых єпіскопів Католицькой церькви, яка проходить од 15-го септембра в Римі. Така стрїча орґанізує ся так само каждый рік, і орґанізує єй Дікастерія про єпіскопів.

На кінцю тыжднёвого проґраму вшыткых новых єпіскопів прийме на авдієнції Вселеньскый Архієрей – Папа римскый Франціск.

Петро МЕДВІДЬ, ЛЕМ.фм, языкова і ґрафічна управа: АРК в СР.