17. 9. 2021: Вернісаж выставкы Зузаны Осавчуковой

Выставка творів Осавчуковой буде в музею понад два рокы.

Словацькый народный музей – Музей русиньской културы в Пряшові позывать на вернісаж выставкы Зузаны Осавчуковой під назвов Дорога к цїлю. Выставка є реалізована з нагоды дарованя вытварных робот авторкы до збіркового фонду русиньского музея. Творы подаровав муж авторкы. Вернісаж одбуде ся 23-го септембра 2021-го року о 16.00 год. на Масарикові 20. Выставка потырвать до 30-го септембра 2023-го року.

Русиньска малярька Зузана Осавчукова-Гапакова (рр. 1934 – 2020) была родачков із села Пінківцї в окресї Собранцї. Скінчіла Руську ґімназію в Гуменнім, пак абсолвовала комбінацію вытварна выхова і російскый язык на Высокій школї педаґоґічній в Братїславі. Учіла на Середній педаґоґічній школї в Пряшові, пізнїше на Катедрї вытварной выховы Педаґоґічной факулты Універзіты Павла Йозефа Шафарика в Пряшові, одкаль у 1991-ім роцї одышла до пензії. В тім самім роцї была прията до Словацькой вытварной унії.

Перед 1989-ым роком, коли Русины не мали властну пресу, робила і в редакції україньского журналу Дружно вперед. Написала учебникы малёваня про першы і другы класы учітельского нампряму і дакілько далшых высокошкольскых учебників про штудентів педаґоґікы о естетіцї і малёваню. У 2014-ім роцї выдала моноґрафію о своїм братови Штефанови Гапакови, котрый быв так само вызначным русиньскым малярём.

В їй творчости доміновав пастел і олїёвы фарбы, творила закутины країны ці букеты квітів. Робила і портреты. Мала много выставок, по выникнутю Словацького народного музея – Музея русиньской културы в Пряшові выставлёвала і там.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.

Script logo