17. 9. 2019: Вышла пята тогорічна книжка АРК в СР – З нами Бог

Сучасну русиньску літературу на Словакії в переважнїй мірї творить поезія. Русиньскы авторы собі язык віршів волять і зато, бо русиньска література ся находить в періодї третёго народного возроджіня, про котре є тіпічна орьєнтація на поезію, народну словесность і темы, што выходять з каждоденного жывота.

Мілан Ґай є русиньскым автором, котрый по змінї сполоченьско-політічных условій по роцї 1989 зачав писати і публіковати в русиньскім языку. Ёго стихы духовной і реліґійной поезії были опублікованы в літературній прилозї Поздравлїня Русинів у русиньскых Народных новинках, Ґрекокатолицькім русиньскім календарю ці в хрістіаньскых часописах Артос і Благовістник. Є автором двох зборників поезій – Молитва Русина (2012) і Моїм родакам (2017). У зборнику Молитва Русина автор підтвердив значіня і важность віросповіданя як єдного з полїрів народной ідентічности Русинів.

Теперь предложеный зборник З нами Бог є зложеный із стихів духовной і набоженьской поезії.  Автор у стихах передає темы як значіня вызнаня віры к Богу, свідомость, согрїшіня і покаяня ся, смертельность тїла і несмертельность душі і под. Тексты ся снажать тыж дати одповідь на тяжко зоповідательный вопрос – што буде по смерти чоловіка. Неістоту і страх з незнамого але можеме перемочі посередництвом  певной і незломной віры, Бог є ідеалом, котрый своёв любвов докаже обняти цїлый світ і котрого увазї не скриє ся ани єден чоловік .

Стихы зборника З нами Бог сповнюють выховну і моралну фукцію літературы, Ґаёвы тексты обертають чітателёву увагу на дії і думкы, приводять го к оцїнїню дотеперїшнёго жывота. Самособов, найвысшым прінціпом в авторовых стихах зістає Бог, котрому ся по смерти будеме одповідати. Але лірічный субьєкт Ґаёвых текстів тыж підкреслює то, же не сьме безпомочны, за каждым грїхом є наше рїшіня а є лем на нас, якым способом ся ку нёму поставиме – ці го будеме повторяти, або го щіро обануєме і будеме жыти інакше. 

Мґр. Міхал ПAВЛІЧ, ПгД., Пряшівска універзіта в Пряшові, Центер языків і култур народностных меншын, Інштіт русиньского языка і културы

Script logo