17. 8. 2021: Тыжден Лемківской Культуры в Музею Істориі Кєльц

Музей Істориі Кєльц заплянувал на тот рік новый проєкт пн. «Своі незнаны», в якым будут презентуваны етнічны меншыны. На інавґурацию першой едициі проєкту зрыхтувано Тыжден Лемківской Культуры.

Од середы, 18. серпня/авґуста, до неділі, 22. серпня/авґуста, пройдут в Кєльцях выклады тыкаючы істориі, архітектуры, культуры і штукы та актуальной і будучой ситуациі Лемків, проєкция фільму «Мій Никыфор» і концерт русиньской музикы в выконаню Аґаты Рымарович з ансамбльом.

Першого дня подіі – в середу, 18. серпня/авґуста, буде мож выслухати выклад Ярослава Ґємзы, кєрівника Одділіня Церковной Штукы Музею Замку в Ланцуті, выдатного знавці ікон і церковной архітектуры, автора книжкы «Церкви і іконы Лемковины». Темом выкладу буде «Сакральна штука Лемковины». Стріча зачне ся о 18.00 год. в будинку Музею Істориі Кєльц при ул. Св. Леонарда 4.

О краєвиді і архітектурі Лемковины буде мож слухати другого дня подіі – в четвер, 19. серпня/авґуста. Про «Церковне будівництво на Лемковині» оповіст Кжыштоф Мысліньскій з Музею Істориі Кєльц. Буде  то стріча з бескідскыма церквами, ілюструванa м.ін. сляйдами авторства Рышарда Якубовского. Выклад так само одбуде ся в будинку Музею о 18.00 год.

В пятницю, 20. серпня/авґуста, о 18.00 год. буде мож в Музею Істориі Кєльц послухати выклад др габ. Олены Дуць-Файфер, яка єст м.ін. заступчыньом ведучого Стоваришыня Лемків, головном редакторком наукового часопису «Річник Руской Бурсы», основательком лемківско-русиньской філолоґіі на Педаґоґічным Університеті в Кракові, поетком і літератком. Др габ. Олена Дуць-Файфер выступит з выкладом пн. «Лемкы. Будуче і текуче».

В рамках проєкту «Своі незнаны» заплянувано і проєкцию фільму Кжыштофа Краузе пн. «Мій Никыфор» з 2005 р., в якым головну ролю заграла Кристина Фельдман. Образ являт ся сфабуляризуваном історийом жытя і творчости вызначного лемківского артисты – маляря примітивісты Епіфана Дровняка, шырше знаного в світі як Никыфор Креницкій. Проєкция одбуде ся в суботу, 21. серпня/авґуста, о год. 20.30 на подворци Інституту Дізайну при ул. Замковій 3 в Кєльцях.

Завершыньом Тыжня Лемківской Культуры буде концерт Аґаты Рымарович з ансамбльом, на якій Музей просит до Дому Творчых Середовиск в Палацику Зєліньского при ул. Замковій 5 в Кєльцях. Музикы запрезентуют в часі концерту м.ін. лемківскы пісні. Аґата Рымарович походит з Бєщадів, але актуально жыє в Кракові. Выконує головні поетицку і традицийну музику.

Вступ на выклады і проєкцию фільму єст безплатный, а вступне на концерт Аґаты Рымарович то 10 злотых. Спілорґанізаторами Тыжня Лемківской Культуры сут Інститут Дізайну і Дім Творчых Середовиск в Кєльцях.

Ленка СТЕФАНОВСКА, ЛЕМ.фм

(Публікуєме в оріґіналї – лемківскім варіантї русиньского языка.)