17. 8. 2020: Уповномоченый про меншыны має за собов далшы робочі стрїчі. Планы суть і з ОСРС
Уповномочнеый влады Словацькой републікы про народностны меншыны Ласло Буковскый має за собов далшы робочі стрічі. Інформовав о них на своїм офіціалнім фанпейджї на сітї Facebook.
В четверь, 13-го авґуста 2020-го року, ся стрїтив на Міністерстві внутра Словацькой републікы з директором особного уряду Михалом Марком. „Од осени будеме продовжовати в языковій компетенчній освітї робітників выбраных окресных урядів в мадярьскім і русиньскім языку. В порївнаню з минувшым роком хочеме запоїти до навчалного процесу окрем одборных робітників і такзваных супервізорів у окремых кліентьксых центрах,“ інформовав Ласло Буковскый.
Status quo на резортї културы
В тот самый день уповномоченый абсолвовав далше їднаня з міністерков културы Наталіёв Мілановов і державным секретарём резорту Радославом Куташом. Стрїча, котра за словами Буковского была конштруктівна, дотуляла ся інштітуціоналного забезпечіня меншыновой културы в рамках резорту.
На остатнїм засїданю Выбору про народностны меншыны і етнічны ґрупы, котре одбыло ся 28-го юла, была одкрыта тема реорґанізації на Міністерстві културы Словацькой републікы, котра ся дотулять і інштітуціоналного забезпечіня културы народностных меншын. Членове выбору втогды выразили обавы повязаны з тыма змінами і пожадали в узнесіню одповідне інштітуціоналне забезпечіня в рамках орґанізачной штруктуры міністерства, котре бы не огрожовало меншынову културу.
Буковскый по їднаню з представителями резорту културы інформовав, же захованя status quo, і кедь дійде ку орґанізачній зміні, є сполочным цїлём.
Рада RTVS і планы з ОСРС
На меншыновім выборї, котрого председом є Буковскый, реґуларно одкрывать ся і вопрос высыланя про народностны меншыны в рамках верейноправного телерозгласу – RTVS.
Уповномоченый зато зорґанізовав засїданя Рады RTVS ку народностному высыланю. Тото засїаня буде прохидити 20-го авґуста 2020-го року і участь на нїй будуть мати окрем Буковского і представителї мадярьской, ромской, русиньской і україньской народностной меншыны. За русиньску меншыну буде брати на стрїчі участь Петро Медвідь.
Іщі перед четверьговым засїданём ся Буковскый вєдно із председом Округлого стола Русинів Словеньска Петром Штефаняком стрїтили (позн. ред.) в понедїлёк, 17-го авґуста 2020-го року, з директором Польского інштітуту в Братїславі Яцеком Ґаєвскым.
Бісїда была (позн. ред.) о зорґанізованю Biblioteca Minorita – 1-го річника бєнале, переглядкы на Словакії выданой літературы в меншыновых языках, котрой головныма орґанізаторами бы мали быти Уряд уповномоченого влады про народностны меншыны, Округлый стіл Русинів Словеньска і Польскый інштітут в Братїславі.
1-ый річник бєнале бы ся мав зорґанізовати іщі перед списованём населїня і мав бы быти єднов з актівностей, котра буде помагати кампанї перед списованём
Петро МЕДВІДЬ, ЛЕМ.фм, языкова і фактічна управа: ред. АРК в СР.
