17. 6. 2021: Папа поблагословив Ікону Пресвятой родины з Джублика

На авдієнції, котра проходила у Ватіканї 16-го юна 2021-го року, была участна і делеґація з Мукачівской ґрекокатолицькой єпархії, котру вів владыка Ніл Лущак, апостольскый адміністратор єпархії.

Як інформовав портал Vatican News, на кінцю стрїчі з путниками Папа римскый Франціск привітав ся з владыком Нілом, котрому поцїловав Панаґію, і поблагословив Ікону Пресвятой родины з Джублика, котру там путници з Мукачівской єпархії принесли.

Джублик є ґрекокатолицьке путницьке місце коло села Нижнє Болотне (до року 1947 Нижнїй Шард, Іршавского раёну). Там ся у 2002-ім роцї коло жрідла зъявила двом дївчаткам – Алёнї Куруць і Маріянї Кобаль, Пречіста Діва. Дївчата далше бісїдовали, же на богослужіня часто приходить цїла Пресвята родина – Ісус, Марія і Йосиф.

Такой у 2002-ім роцї ся в Джублику одправляла перша літурґія, яку служыв єпіскоп Іван Марґітич. В децембрї того самого року прияв візіонарькы на авдієнції Папа римскый Йоан Павел ІІ., котрый їх поблагословив.

В роцї 2004 владыка Мілан Шашік, котрый быв у тім часї апостольскым адміністратором Мукачівской єпархії, засновав в Джублику монашу общіну Собору Пресвятой Богородіцї, яка дїлить ся на два монастырї – про мужів і про жены. Архімандрітом є правлячій єпарха мукачівскый.

На місцї, де одбыли ся зъявлїня, была збудована і лїтня одпустова Церьков Непорочного Зачатя Пречістой Дівы Марії.

Петро МЕДВІДЬ, ЛЕМ.фм, ґрафічна і языкоїва управа: ред. АРК в СР. Жрідло фотоґрафій: Vatican News.