17. 5. 2024: Вмерла лавреатка Премії Александра Духновіча – Наталія Канюх

14-го мая 2024-го року у віцї 74 років вмерла русиньска поетка, перекладателька, писателька Наталія Канюх. Інформовала о тім аґентура Рутенпрес. Канюх была лавреатков Премії Александра Духновіча за русиньску літературу.

Народила ся Наталія Канюх, з дому Гербут, у 1950-ім роцї в Ґосподінцях, днесь Сербія. Выштудовала югославяньску літературу на Універзітї в Новім Садї. В русиньскій літературї была присутна од молодых років і то в многых областях. Зачінала як редакторка літературной прилогы ґазеты Руске слово з

назвов Литературне слово, была поетков, есеїстков, літератрным крітіком, але і перекладательков а рецензентков многых русиньскых выдань. З їй пера вышли і пєсы про дїти, ці сценарї про телевізію і радіо.

Выданы їй были дві книжкы, обидві у выдавательстві Руске слово в Новім Садї. Першов быв зборник поезії під назвов Виривок із 1987-го року, другов поема з назвов Дом мур брудна рика мост, яка вышла у 2006-ім роцї.

Їй творчость найдеме і в антолоґії русиньской поезії з цїлого світа під назвов Русински / Руски писнї, котра вышла у 1997-ім роцї в Новім Саді під редаґованьом Наталії Дудаш.

Наталія Канюх двараз, у 1985-ім і 2005-ім роцї, здобыла Нагороду часопису Шветлосц за найлїпшый твор. У 2011-ім роцї стала лавреатков Премії Александра Духновіча за русиниску літературу. Премію, котру удїлёвав Карпаторусиньскый научный центер в Споєных штатах Америкы, здобыла за книжку Дом мур брудна рика мост.

„Дом мур брудна рика мост – то детайлна фіксація жытя творчой особы в періодї бомбардованя міста Новый Сад летадлами НАТО почас Косовской войны 1999-го року. Є то дзеркало каждоденного страху і выдержяня поеткы, котра стала свідком ничіня свого міста. Наталія Канюх безутїшности протиставлять пересвідчіня, затятость і надію на захованя міста і себе. Як поетка, художный цїль досягує вдяка доконалости поетічной формы, трансформації страху на тугу за гармоніёв і міром,“ написав тогды літературознатель Валерій Падяк.

Дїяла і як перекладателька на русиньскый і сербскый язык в службах покраїньскых урядів у Войводинї. Як пензістка жыла в Руменцї. Наталія Канюх буде похоронена 18-го мая в Новім Садї. Вічная память!

Петро МЕДВІДЬ, ЛЕМ.фм, языкова і ґрафічна управа: АРК в СР.