17. 5. 2020: Найрусиньскішый окрес на Словакії зіставать єдиный без коронавірусу

Окрес Меджілабірцї має дакілько най. Є подля середнёго віку жытелїв найстаршым в рамках Пряшівского самосправного краю і найменшым, што до кількости жытелїв у рамках цїлой Словакії.

В окресї ся голосить подля послїдного списованя людей у 2011-ім роцї  понад 60 процент населїня ку русиньскій народностній меншынї, і так є найрусиньскішым окресом на Словакії. Што моментално найвеце тїшыть, окрес Меджілабірцї, подля ставу ку 14-му маю 2020-го року, не мав ани єден припад інфікації новым тіпом коронавірусу. Зіставать послїднїм, єдиным окресом в рамках Словакії, де пандемія не пришла.

Як повіли компетентны про денник Korzár іщі 6-го мая, не є то дослїдок слабой міґрації за роботов ці низкой кількости тестованых.

Превентіва є пріорітов

Пріматор міста Владислав Вышнёвскый про денник повів, же ся сітуації тїшать. За ёго словами вдяка належыть вшыткым жытелям, котры одповідно дотримують строгы превентівны рештрікції.

„Превентівна діятельность є про нас барз важнов, роблять і дотримують єй вшыткы орґанізації в містї. Всядыль суть дезінфекчны препараты, люде слухняно носять охранны маскы, дакотры і рукавіцї,“ підкреслив пріматор, котрого цітовав денник.

Міґрація є за ёго словами єднака як і в іншах частях Словакії. Люде, котры робили в загранічу, ся вертали і до окресу Меджілабірцї, но нащастя нихто не пришов інфікованый. В містї тестовали і різіковы марґіналізованы ґрупы жытелїв.

„Проценто тестованя в окресї є порівнательне з остатнїма окресами,“ повіла Ленка Леснякова з Реґіоналного уряду здравотництва в Гуменнім. „Звычайно тестуєме людей з підозрїнсём на хвороту, так само і марґіналізованы ґрупы, з неґатівным резултатом.“

Строгы наряджіня в окресї не увольнюють, додав пріматор, і роблять вшытко так, жебы ани теоретічно не могло дійти ку тому, жебы ся новый коронавірус пошырёвав. Думать, же полявити в наряджінях бы была велика хыба. Окрес комунікує і зо старостами сел, подавають їм інформації о наряджінях і рештрікціях. І на Окреснім урядї ся згоднуть з містом, же абсенцію хвороты в окресї мож приписати одповідному приступу жытелів.

Маленькый окрес

В містї Меджілабірцї за даныма із 2019-го року жыє 6531 жытелїв, в цїлім окресї є їх 11 787, што є найменше в рамках цїлой Словакії. Середнїй вік населїня окресу є 42,75 років, чім ся Меджілабірцї стали найстаршым окресом Пряшівского самосправного краю.

Script logo