17. 5. 2018: В Мадярьску тот рік День Русинів в Еґерї
До Еґеру кличуть тот рік мадярьскы Русины святковати День Русинів. Святочный проґрам одбуде ся 26-го мая 2018-го року і зачне Божественнов літурґіёв в еґерьскый базиліцї.
День Русинів є в Мадярьску выголошеный на 22-го мая. Тот день у 1703-ім роцї Томаш Есе в Береґсасї підняв прапор і залучів підкарпатьскых Русинів до ослободительской войны Ференца Ракоція ІІ. Ракоцій пізнїше назвав Русинів за їх вірну службу Gens fidelissima – найвірнїшым народом.
Главным орґанізатором події вже традічно є „Вседержавноє Русинськоє Самосправованя‟ і покровительство над святом тот рік перевзяв Міклош Шолтис, державный секретать про реліґійны вопросы, народностны і цівілны повязаня Міністерства робочіх жрідел.
Главный проґрам буде проходити од 13.00 год. у просторах авлы середнёй школы при Універзітї Карола Естергазія. Участным приговорить ся Віра Ґіріц, посланкыня за Русинів у мадярьскім парламентї, Віктор Крамаренко, котрый є председом цїлодержавного самосправованя Русинів у Мадярьску, і Ласло Гобіша – пріматор міста Еґер. Участны можуть тїшыти ся на музичный проґрам. Выступати буде фолклорный ансамбель Бабчина співаночка і солістка Лілія Немеш, котры прийдуть із Підкарпатя. Комплетный проґрам мож відїти на плаґатї.
В Мадярьску творять русинську комуніту автохтонны Русины, котры на тых теріторіях жыли цїлы стороча, як і переселенцї, главно із Підкарпатя, якы там пришли за роботов і зістали там. Подля послїднёго перепису населїня, котре проходило у 2011-ім роцї, приголосило ся 3882 людей ку Русинам. Ку русиньскому материньскому языку приголосило ся лем 999 людей.
П. М.