17. 2. 2023: Юрко ХАРИТУН: Не здавати ся, Лем будь моя, Чом, чом, чом? (Поезія )

ЮркоХаритун

 

НЕ ЗДАВАТИ СЯ

Писати, творити

Поетова робота не легка

То так як студню копати

І не знати

буде або не буде у нїй вода

не треба здавати ся

Копати аж до дна

Вытріскне як лава

Напити ся як доброго вина

 

 

ЛЕМ БУДЬ МОЯ

Мати кожух

як мають медведї

Прикрыю тя

і буде тепло тобі

Мати крыла

як мають мотылї

Понесу тя

де хочеш ты

Не маю кожух медвідя

Не маю крыла мотыля

Притулю тя

і буде вічно моя

 

 

ЧОМ, ЧОМ, ЧОМ?

Чом пишу

Чом пишу і в ночі

Чом пишу і в ночі а не сплю

Бо знаю

Бо знаю добрї

Бо знаю добрї, же мушу одыйти

Чом так повторюю слова

бо так шепоче менї рїка

яка одтїкать

А я не можу зохабити

На столі недописаны віршы

Допишу їх як свічкы догорять