17. 2. 2020: Позваня на презентацію книжкы „Дротарі‟ – автобіоґрафічный роман Івана Киндї

Любителїв літературы позываме на святочну презентація книжкы під назвов „Дротарі‟ – автобіоґрафічный роман писателя Івана Киндї, яка ся одбуде 19. фебруара 2020 у Вышнёземпліньскій книжніцї у Вранові над Топлёв.

Тота книжка вышла кінцём 2019 рока і выдала ю у двох языках (русиньскім і словацькім) Русиньска оброда на Словеньску. Роман з україньского языка переложыла Анна Кузмякова. Першыраз вышли „Дротарі‟ у 1974-ім роцї, десять років по смерти автора. Но кедьже втогды офіціално русиньска народность у Чехословакії не „єстновала‟, книжка вышла в україньскім языку. „Моє желаня выдати го (роман – позн. ред.) з нагоды 55-ой річніцї од смерти автора в словацькім і русиньскім языку ся сповнило, наперек  тому, же то не было аж так легко,“ пише в подякованю Любоміра Шлахтовска, внучка Івана Кіндї.