17. 2. 2018: Вышов новый русиньскый учебник
В тых днях вышов далшый хосенный учебник під назваов „Hovoríte po rusínsky? / Бісїдуєте по русиньскы? / Do you speak Rusyn? (Vysokoškolské učebné texty / Высокошкольскы учебны тексты / University textbook) авторок-высокошкольскых учітелёк Пряшівскойн універзіты: ПгДр. Кветославы Копоровой, ПгД., доц. ПгДр. Анны Плїшковой, ПгД., Мґр. Евы Едді, ПгД. (Prešov: Vydavateľstvo Prešovskej univerzity, 2017, 192 s., ISBN 978-80-555-1957-9), рецензентами котрого суть доц. ПгДр. Василь Ябур, к. н., пpоф. Др. Михаіл Капраль, к. н. Книжка буде хосенна главно про штудентів каждорічных меджінародных лїтнїх школ русиньскогого языка на Пряшівскій універзітї в Пряшові (Словакія). Ниже піблікуєме вступне слово авторок:
Милы штуденты,
тримлете в руках далшый інтересный учебник русиньской конверзації,
цїлём якого є выходячі із словацького языка, помочі вам розвивати
вашы языковы способности в першім рядї в русиньскім языку.
Спочатку нашым заміром было выдати лем двоязычный учебник
конверзації – русиньско-анґліцькый, якый бы (окрем штудентів русиньского языка Пряшівской універзіты) могли хосновати і штуденты Мeджiнародной лїтнёй школы русиньского языка і културы Studium Carpato-
Ruthenorum. Але призераючі на факт, же сучасна молода ґенерація
русиньского походжіня у Словакії скорїше набывать языковы компетенції зо словацького, як з русиньского языка, мусили сьме нашу первістну концепцію змінити: нелем же сьме в процесї рихтованя учебника вырїшили до нёго доповнити діалоґы в словацькім языку, але поставивши їх на перше місце, дали сьме їм акцент домінантности. Думаєме собі, же така зміна буде нелем хосенна, але і практічна, бо на основі нёй конверзовати в русиньскім языку ся може навчіти веце штудентів, і нелем русиньского походжіня. А то є ай основным цїлём даного учебника, в якім є по першыраз розроблена конверзачна етікета і конверзачны темы в русиньскім літературнім языку в такім шырокім планї. Віриме, же поставлены притискы (акценты) на словах будуть тыж великым помічником при освоїню літературной высловности в сучаснім русиньскім языку.
Авторы
