16. 9. 2022: Гелена ҐІЦОВА-МІЦОВЧІНОВА: Стишкы

Гелена Ґіцова-Міцовчінова

***

Понагляла

малярочка,

злата осїнь

із фарбами

уж ярочком,

бо на стромі

на яблони

малёване

на червено

там яблочко.

 

***

Хоць уж осїнь

слызы ронить,

але смачны

соковиты

плоды вісять

на яблони.

 

З фарбами

ся спустила

з горбочка,

малёвала

на червено

в нашім садї

там яблочка.

 

Же садївник

уж од яри

з малярьков

добры рады

вели вєдно

десь на спадї,

зато ся уж

там червены

і зелены,

та і жовты

камараткы

ся гомбають

в нашім садї.

 

***

Од радости

крїчать дїти

так як дикы,

бо в осени

скраю лїса

там глядають

уж грибикы.

 

На полянцї

і без зброї

стражник стоїть,

не мать очі

і без ушок,

вночі стратив

і кожушок,

лем на ножцї

круглый, рудый

капелюшок.

 

 

(Выбране з приправлёваной книжкы  Гелены Ґіцовой-Міцовчіновой – Капкы росы.)