16. 9. 2019: У Свіднику одсвяткують 200 років од народжіня Павловіча

19-го септембра 2019-го року мине точно 200 років од народжіня русиньского народного будителя, ґрекокатолицького священика і поета Александра Павловіча.

Маковіцькый соловій, як собі Павловіч выслужыв названя вдяка своїй богатій поетічній творчоти, скро 37 років служыв парохом у Свіднику. Там є і похованый, має там панятник і місто му у 2011-ім роцї удїлило тітул честного жытеля. Ани теперь Свідник не забыв на будителя Русинів. За участи пріматоркы міста Марцелы Іванчовой буде в четверь, 19. 9. 2019,  проходити сімпозіюм, котрый має назву Народу вірный єм быв…

Святкованя 200-ой рочніцї од народжіня будителя зачне рано літурґіёв у Ґрекокатолицькій церькви Божой Мудрости, по котрій буде слíдовати панахіда коло гробу Александра Павловіча. Пак вже участны підуть до просторів Піддукляньской бібліотекы у Свіднику, котра є орґанізатором святковань. В ній буде проходити сімпозіюм.

На сімпозію буде мож выслухати сім лекцій в двох блоках. Ріхард Павловіч буде бісїдовати о ґенеалоґії роду Павловічовых, православный священик Петро Савчак одпрезентує Павловіча як боёвника. Ярослав Джоґаник участным представить літературну дїдовизну Александра Павловіча, котра того часу находить ся у фондах Словацького народного музею – Музею українськой културы у Свіднику. Йосиф Лелё буде глядати повязаня будителя зо Свідником.

Другый блок одкрыє председа Русиньской оброды на Словеньску Мартін Караш, котрый буде говорити о Павловічови як народнім будителёви Русинів. Знамый русиньскый етноґрафі і фолклоріста Іван Чіжмарь приготовив про участных лекцію під назвов Александер Павловіч і народна співанка. Пріматорка міста Свідник Марцела Іванчова ся на Павловіча посмотрить як на честного жытеля міста.

Завершінём події буде выголошіня резултатів конкурзу Павловічів літературный Свіндик. Тот конурз шторік орґанізує Піддукляньска бібліотека у Свіднику.

Петро МЕДВІДЬ, ЛЕМ.фм