16. 7. 2020: Варголів музей має рекордне чісло домашнїх навщівників
Музей модерного уменя Енді Варгола в Меджілабірцях навщівлпює од зачатку лїтнїх вакацій рекордне чісло домашнїх турістів. Музей є першый із двох у світї і єдиный у Европі такого тіпу. Як про аґентуру TASR повів директор музею Мартін Цубяк, покля в минулости были найчастїшыма навщівниками турісты з Польщі, за котрыма наслїдовали жытелї різных европскых держав, тото лїто ходять главно люде із Словакії. З лїтнїма подіями притім музей іщі ани не зачав.
Рекорды і вдяка кампанї
„В понедїлёк (6-го юла 2020) сьме мали дотеперішнїй рекорд, 317 навщівників. Музей офіціално заперать о 16.00 год., но мали сьме втогды одкрыто до 18.30 год. і мусили сьме реґуловати вступы,“ повів о затля найве успішнїм дню Цубяк. Додав, же окрем людей із Словакії в тот день мали і навщівників із Польщі і Чеськой републікы.
Цубяк видить за векшым чіслом домашнїх, котре є почас тыждня коло сто і почас вікендів коло 200 людей, маркетінґову кампань, з котров музей зачав почас пандемії, коли быв примушено запертый. Відеосерія, котра є доступна в службі Youtube пропаґує умелцїв, котрых творы мож відїти в Меджілабірцях.
Найвекшым тяглом того лїта має быти окрем стабілной експозіції і выставка особности америцькой underground сцены 1980-ых років Кеіта Гарінґа. Гарінґ ся у своїх творах занимав темами Апартеіду, епідемії AIDS ці проблематіков людей завислых на наркотіках. Выставка Radiant World в Музею модерного уменя Енді Варгола в Меджілабірцях, на котрій буде мож відїти 40 творів Кеіта Гарінґа, є подля Цубяка затля найвекшов експозіціёв того умелця на Словакії.
Буде сприступнена 21-го юла 2020-го року, но з причіны пандемії не буде проходити класічна вернісаж. Почас цїлого дня будуть доступны двоми аж трёми кураторы музею, котры будуть забезпечовати навщівникам коментовану переглядку.
Продовжує і проєкт Stage
Події в рамках проєкту Stage в лїтї зачнуть 23-го юла 2020-го року. „Іншпіруєме ся все даяков датов у конкретнім місяцї, котра якымсь способом повязана будь з Енді Варголом або з умелцём, котрого образы можуть навщівници в музею відїти,“ повіла про аґентуру о проєкті, котрый музей реалізує од фебруара того року, музеёедуколоґічка і помічна кураторка Кармен Ціліпова.
Першыма, кым будуть в музею занимати ся, суть street art умелкыня Бамбі і їй муза Еймі Вайнгаус, котрой смерть собі світ припоминать якраз 23-го юла. О штири днї пізнїше буде главнов особностёв коментованой переглядкы і супроводного вытвартного варштату Мік Джеґґер, котрый буде мати 27-го юла 77 років.
Петро МЕДВІДЬ, ЛЕМ.фм, жрідло фотоґрафії: muzeumaw.sk, языкова управа: ред. АРК в СР.
