16. 6. 2023: Гелена ҐІЦОВА-МІЦОВЧІНОВА: І співам, і плачу (3. часть з припралёваной книжкы з таков самов назвов)

Гелена Ґіцова-Міцовчінова

 І співам, і плачу (3.) 

***

Кого ся просити,

Ты Боже наш

Любый,

чом же понад

хыжу

не летять

голубы

лем крячуть

гавраны

же од них

в сердцї

розятрены

раны.

 

***

Може Ты,

Спасителю світа,

Сыне Божый,

материньскы

скаргы выслухаш

вылічіш

сердце боляче

зошлиш

грішній

Дар

Святого Духа

якый мої

просьбы

выслухать.

 

***

Ці то мої

зернята нещастя

під горов Дїлець

розосяты

котры Ты

моёв молитвов

загладиш

Духу Святый.

Тай на столї

папірь чістый

а у руц перо

то моя міцна

зброя

што Твої

благодарны

слова

боляче сердце

выгоять.

 

***

Хоць мій

любый муж

знав на гуслях

прекраснї заграти

але мі

треба было

хусточков

з лиця

слызы

повтирати.

 

***

Кажда

нещастлива мати

знать ся з ласков

аж до смерти

о любезне

дїтя постарати.

Лем єдине

на світї

нихто незнать

як колячій терен

зо сердця

выбрати.

 

***

Не заспівать мама

гуды, гуды басы

перестань плакати

даме ті колбасы.

Я уж прескакую

лем тернёвы крячкы

над головов смутнї

крячуть дикы качкы.

І руде волося

мамі посивіло

і щастя із дому

давно одлетїло.

За дїтинства была

і в стайнї схованка

днесь на моїх очах

счервеніла бланка.

Хоць мої дражочкы

давно скрижованы

вдяка же з головы

слова не повыбераны.