16. 6. 2016: Вшыткых Русинів позываме до Біловежы

Свято русиньскых будителїв А. Духновіча і А. Павловіча є назва 36-го річника русиньского фолклорного фестівалу у селї Біловежа в Бардеёвскім окресї, котрый буде проходити в недїлю 26-го юна 2016-го року. Орґанізаторами свята є село Біловежа на челї зо старостом Петром Мікулом (інакше член Выконного выбору Русиньской оброды на Словеньску, председа єй Містной орґанізації у Біловежі, актівный русиньскый діятель, пропаґатор і збератель малярьского кумшту русиньскых авторів), Русиньска оброда на Словеньску і Вышнёшарішскый центер културы у Бардеёві.

 

Цїлоденный проґрам свята зачне о півдесятій годинї дообіда ґрекокатолицьков святов літурґіов у церьковнославяньскім языку в сільскій церьклви, де будуть співати многы співацькы ґрупы, котры придуть выступати на фестівал. По літурґії на дворї перед сільсков парохіов, де з ініціатівы Окресной орґанізації РОС на челї з єй бывшым председом Іваном Бандурічом была в 1995-ім роцї уміщена памятна табла русиньскым будителям Александрови Духновічови і Александрови Павловічови, котры у Біловежі жыли і діяли, будуть нашы люди споминати на тоты рокы, через котры у селї проповідали, учіли і діяли нашы вызначны великаны.

Потім од фарьского уряду кроёваным походом підуть вшыткы выступаючі гудаци і співаци, орґанізаторы, гостї і многы участници свята співаючі на сільскый амфітеатер, а то як жыва пропаґація і запрошіня на далшый проґрам красного свята. На сценї амфітеатру, окрем домашнїх дїточок, школярїв і Біловежанкы, выступлять колектівы і співацькы ґрупы – Барвінок із Камюнкы, Йозеф Мак із Баньской Быстріцї, ґрупа Фатёвы з Мукачова, Шамбрінцї зо Шамброна, дуеты Л. Чушкова і М. Чічвакова з Біловежы, І. і М. Карашовы з Камюнкы, Стефані Ковачова з Ортутовой, співацькы ґрупы Вінок із Шарішского Ястрабя і ґрупа Мелоді при Готеловій академії Я. Андращіка в Бардеёві, а на завершіня красного свята выступить і наш професіоналный колектів ПУЛС із Пряшова. Модераторьскым словом цїлого проґраму свята буде провадити Штефан Гій, бывшый артіст Театру Александра Духновіча і родак з Біловежы. Частёв події буде выставка історічных фотоґрафій із села Біловежа і образів із русиньсков тематіков.

Подія реалізує ся із фінанчнов підпоров Уряду влады СР – проґрам Култура народностных меншын 2016 і Пряшівского самосправного краю.