16. 6. 2016: В Міджілабірцях одкрыють памятну таблу Світовому конґресу Русинів

  • Погляд на презідіалный стіл 1. установчого засїданя Світого конґресу Русинів, котрe ся одбылo 23. – 24. марца 1991 у Міджілабірцях. Выступать єден із закладателїв СКР – Павел Роберт Маґочій.

    Погляд на презідіалный стіл 1. установчого засїданя Світого конґресу Русинів, котрe ся одбылo 23. – 24. марца 1991 у Міджілабірцях. Выступать єден із закладателїв СКР – Павел Роберт Маґочій.

В рамках 54-го річника Фестівалу културы і шпорту в Міджілабірцях, котрый буде проходити в днях 24-го аж 26-го юна 2016-го року, одбуде ся і святочна подія одкрытя памятной таблы із нагоды 25-го юбілею од зорґанізованя 1-го Світового конґресу Русинів, котрый проходив у днях 23-го аж 24-го марца 1991-го року.

 

Памятну таблу фінанцовав пріматор міста Міджілабірцї Владїслав Вішнёвскый. Буде уміщена на Културнім домі, котрый є днесь знамый головно тым, же в нім є і Музей модерного уменя Ендія Варгола. Якраз в тій будові перед 25-ма роками проходив і першый конґрес.

 

„На памятній табліцї буде напис: В просторах того будинку в днях 23-го аж 24-го марца 1991-го р. проходив 1-ый Світовый конґрес Русинів. Світова рада Русинів – Міджілабірці 24-го юна 2016-го року. Текст буде троязычный – по русиньскы, по словацькы і по анґліцькы. Горї буде русиньскый ерб,“ повів про нашу редакцію секретарь Світовой рады Русинів Владимір Противняк. „Участь на святочній події приобіцяв і професор Павел Роберт Маґочій, котрый быв єдным із головныx ініціаторів першого конґресу,“ продовжовав Противняк.

Святочне одкрытя памятной таблы буде проходити за участи Світовой рады Русинів дня 24-го юна о 16.00 год. коло спомянутого Културного дому в Міджілабірцях.

 

З історії

 

По довгых роках українізації, котра проходила в державах комуністічного блоку, на кінцю 80-ых і зачатку 90-ых років 20-го столїтя основанём русиньскых орґанізаціях зачінав повставати русиньскых рух. Днесь тот рух звеме як третє народне возроджіня Русинів. Русиньскы орґанізації, котры в розвалинах соціалізму зачали діяти і возроджовати народ в окремых державах, скоро зрозуміли, же є потрібна співпраца і в рамках цїлосвітового форуму.

 

Поступно ся одкрывали граніцї міджі окремыма державами і тым ся вытворили і новы можливости про взаємны контакты міджі Русинами. Наповнінём ідеї зробити якыйсь цїлосвітовый форум Русинів наповив ся у 1991-ім роцї, кідь завдякы запаленым і одважным Русинам з Русиньской оброды (в тім часї існовала іщі Чехословакія і назва орґанізації была лем Русиньска оброда, аж пізнїше, по выникнутю Словакії зачала ся хосновати назва Русиньска оброда на Словеньску) і представителїв русиньского руху в далшых пятёх державах Европы і Северной Америкы, быв скликаный до Міджілаборець 1-ый Світовый конґрес Русинів (СКР), котрый мав про Русинів велике значіня і вырїшалный вплив про їх нове возроджіня. По довгім часї неслободы ту Русины світа надвязали першы контакты. Тот першый конґрес в Міджілабірцях положыв міцьный фундамент і накреслив далше прямованя свого народностного жывота і мав великый вплив на розвиток русиньской комуніты в цїлосвітовім масштабі.

Од той історічной події минуло уж 25 років. За тот період собі орґанізація СКР выбудовала свою орґанізачну штруктуру, котру днесь творять представителї Русинів Словакії, Україны, Польщі, Мадярьска, Сербії, Хорватії, Чехії, Румунії і Северной Америкы (США і Канада).

 

Треба высоко оцїнити тых людей, котры стояли при зродї міджінародной орґанізації, а то главнї Василя Турока, Павла Роберта Маґочія ці Андрія Копчу, но і іншых запаленых русиньскых функціонарїв з Войводины в бывшій Югославії, зо Закарпатьской области Україны і Северной Америкы.

 

П. М.

 

Script logo