16. 5. 2019: ТАД одпремєрує Пісковиско Михала Валчака

В пятніцю, 17-го мая 2019-го року, одбуде ся на Малій сценї Театру Александра Духновіча в Пряшові (ТАД) вже четверта премєра в рамках той театралной сезоны. Русиньскый професіоналный театер тот раз інсценує текст польского автора Михала Валчака.

„Пісковиско є найлїпша пєса (гра) 21-го столїтя про двох акторів (грачів)“, пишуть творцёве о новій інсценації. Режійно нову пєсу приготовлює Бранё Мазух, про котрого є то третя сполупраца з ТАД. Перед тым режіровав Достоєвского Бісы і Краля Убу Алфреда Жарї.

 

Пісковиско як платформа про конфронтацію

Пєса Пісковиско із 2002-го року є першым твором польского драматіка Михала Валчака, котра была оцїнена в рамках конкурзу Мы на порозї новой епохы, і котра дочекала ся великой одозвы нелем в Польщі, але і за граніцями.

Такой потім выникли ёго далшы пєсы як Путь до внутра цімрыЧудна рікаБаняНочный автобусЦїле жытя Ярослава ці Налпа. Валчаковы тексты барз скоро дочекали ся перекладів до анґліцького, нїмецького, літовского, італійского, французьского, сербского, чеського, словацького і до многх іншых языків. Пісковиско є перша ёго пєса, котра вже має і русиньску верзію.

Пісковиско є пєса про двох акторів – мужа і жену, котра є роздїлена до шестёх образів – шестёх днїв, котры суть зображены часточно як дополїдне, часточно як пополїдне. Но і в тім буде інсценація в русиньскім театрї дакус выняткова. Режісер вырїшыв зохабити мужску і женьску роль, но грати будуть дві акторкы. Зденка Кваскова взяла на себе роль мужа, Івета Фейкова буде грати жену. Обидві належать ку наймолодшій ґенерації членів драматічного колектіву ТАД.

„Много сітуацій, котры здають ся быти дорослыма, суть в реалности інфантілны,“ пише автор о своїй пєсї, в котрій першорядно конфорнтує мужскый погляд на світ із женьскым. Но як пишуть інсценаторы, секундарно є Пісковиско так само платформов про конфронтацію дїтячого і дорослого, реалного і фіктівного, высловленого і замовчаного, певного і текучого, конкретного і абстрактного.

 

Михал Валчак

Польскый драматік Михал Валчак (1979 р.) є сполуоснователём варшавсого кабарету Pożar w Burdelu і належыть меджі найвыразнїшы авторьскы особности сучасного польского театру. Выштудовав театралну науку і театралну режію на Театралній академії у Варшаві.

За „вытворїня унікатного, крітічного і проникаво гуморного языка, котрый описує днешню Польщу“ быв вєдно із Мацієём Лубєньскым у 2017-ім роцї номінованый на премію польского тыжденника Polityka, такзваный Paszport „Polityki“.

Премєра Валчакового Пісковиска одбуде в пятніцю о 19.00 год. День перед тым, в четверь, 16-го мая, мож іти на предпремєру, котра одбуде ся в єднакім часїі.

Петро МЕДВІДЬ, лем.фм

Script logo