16. 3. 2020: В Клокочові выникне путницькый центер

На старім путницькім місцї ґрекокатоликів на Земплінї, в селї Клокочів в окресї Михалівцї, выникне путницькый центер. Ёго основный камінь посвятив 7-го марца 2020-го року апостольскый адміністратор Кошыцькой ґрекокатолицькой єпархії владыка Кіріл Василь.

Посвячіня основного каміня проходило в рамках марцовой фатімской суботы. Архієрейску літурґію, в рамках котрой быв камінь посвяченый, служыли обидвоми кошыцькы владыкове – єпарха Мілан Хаутур і адміністратор Кіріл Василь. Інформовав о тім Пресовый центер Кошыцькой єпархії. Основный камінь є близко теперішнього польного престола, на котрім ся служыть почас векшых одпустовых і іншых подій.

 

Центер з уквартелёванём

Проєкт путницького центру в ареалї найвызначнїшого і найстародавнїшого путницького місця Кошыцькой ґрекокатолицькой єпархії, має наповнити такой дві амбіції.

Реконштрукціёв сучасных просторів бы мала выникнути адекватна база про приниманя путників, включно поліфункчной авлы, інформачного центра і гіґєнічных зардяджінь. Другым пунктом є вытворїня просторів на уквартелёваня.

„Путницькый центер має служыти і як заряджіня на уквартелёваня про тых, котры бы хотїли на берегах Земпліньской шыравы абсолвовати духовны ексерціції, припадно іншым способом підпорити розвиток реліґійного турізму під Вігорлатом,“ інформовала єпархія. Капаціта на уквартелёваня бы мала быти про 40 особ.

 

350-та рочніца Клокочівской Богородіцї

Село Клокочів стало вызначным путницькым місцём іщі в роцї 1670, по тім, што ікона Пресвятой Богородіці в містній ґрекокатолицькій деревяній церькви зачала почас куруцькых воєн, в котрых боёвали Русины по боцї Франтїшка ІІ. Ракоція, слызыти, пізнїше і рыдала. В Клокочові ся моментално находить їй друга копія. Де є оріґінална ікона і їй перша копія ся не знать.

В рамках 350-той рончіцї того чуда Кошыцька ґрекокатолицька єпархія выголосила рік 2020 за Юбілейный рік. В рамках нёго ікона Клокочівской Богородіцї буде і в Римі, папа Франціск коло нёй буде служыти омшу 29-го юна 2020. При тій нагодї хоче папу кошыцькый єпархіалный єпіскоп владыка Мілан Хаутур пожадати, жебы народну назву іконы підняв до офіціалной подобы реґіоналной назвы „Покровителька Земпліна“.

Петро МЕДВІДЬ, ЛЕМ.фм

Script logo