16. 10. 2020: Ґрекокатолици вызберали про постиженых експлозіёв віюрючіх в Бейрутї понад 55 тісяч евр

Понад 55 тісяч евр – то сума, котра была вызберана в рамках міморядной збіркы, котру в половинї авґуста выголосив пряшівскый ґрекокатолицькый архієпіскоп і метрополіта Іоан Бабяк. Збірка проходила 30-го авґуста у вшыткых ґрекокатолицькых парохіях цїлой Ґрекокатолицькой метрополітной церкви sui iuris на Словакії.

В середу, 14-го октобра, о тім інформовав Михал Павлишіновіч з Інформачного центра Пряшівского архієпіскопства. В Пряшівскій архієпархії ся вызберало 40 500 евр, у парохіях Кошыцькой єпархії то была сума 9 759 евр, і віруючі Братїславской єпархії вызберали 5 090, 67 евр. Довєдна сума представлює 55 349,67 евр.

Як ся пише у пресовій справі, цїла вызберана сума была в тых днях послана на банкове конто Патріархату мелкітьской ґрекокатолицькой церькви, котру веде патріарха Юссеф Абсі (на фотцї). Єдночасно было загнане і супроводне писмо, в котрім быв высловленый і замір єрархів Ґрекокатолицькой церькви на Словакії, жебы ся збірка перероздїлила меджі вшыткы штири восточны католицькы патріархаты, котры діють в Бейрутї.

В Лібанонї діє веце восточных католицькых церьквей і в Бейрутї є центер трёх патріархатів. Найвекша є Маронітьска церьков, далше Сірійска католицька церьков і третёв патріархалнов церьквов є Армяньска церьков. Другу найвекшу кількость віруючіх в Лібанонї має Мелкітьска ґрекокатолицька церьков на чолї котрой є патріарха Юссеф Абсі. Тот має резіденцію в сірійскім Дамаску, но почас рока вецераз стримує ся і в резіденції в Бейрутї.

В лібаноньскій главнім містї Бейрут велика експлозія, котра одбыла ся 4-го авґуста того року, взяла жывот понад 170 людём, тісячі были зранены і понад 300 тісяч людей зістало без стрїхы над головов. Волна тиску по експлозії пошкодила веце катедралных соборів і храмів, так само знефункчнила три з пятёх великых шпыталїв у Бейрутї.

Такой по нещастній дії свою соналежность з лібаноньскыма віруючіма выразлили і єрархове Ґрекокатолицькой церькви на Словакії. „Молю ся за жертвы того нещастя і за їх родины, так само за вшыткых зраненых, ці людей, котры пришли о своє обыстя,“ написав втогды у писмі патріархови Юссефови Абсі архієпіскоп Бабяк.

Петро МЕДВІДЬ, лем.фм, языкова управа: ред. АРК в СР.