16. 10. 2019: ТАД одпремєрує пєсу Познатый непознатый
На пятніцю, 18-го октобра 2019-го року, притовив Театер Александра Духновіча в Пряшові свою першу премєру в театралній сезонї 2019/2020. Пєса Познатый непознатый (Homo sapiens) в режії Антона Коренчія є зроблена на мотівы пєсы Владіміра Гурбана Владімірова Homo sapiens. Режісер підкреслив, же публіка ся не мусить бояти важных тем, чекать на вас комічна обробка, котра ся выразить і ку сучасности.
Театер з правіку
„Homo sapiens, чоловік розумный, як сьме самы себе пышно назвали, є безпохыбно найнасилнїшым сотворїнём на планетї. Докажеме єй іщі уратовати? Докажеме уратовати самых себе, кедь ани зданя не маєме, хто сьме? На основі чого вырїшуєме? Одкыль і де крачаме? Насилство нас проводить од початку і не здасть ся, же бы ся рихтовало счезнути. Насилство лежыть в сердцї людьской културы і в сердцї каждого єдного з нас. Были бы сьме то іщі все мы – без насилства? Без културы? Без жертв? Без священого? І хочеме досправды знати правду?“
Така є анотація найновішой пєсы, котру Театер Александра Духновіча од пятніцї буде мати у своїм репертоарї. Інсценація є зроблена вольнї на мотівы пєсы, котра выникла у 1924-ім роцї.
Автор, властным меном Владімір Конштантін Гурбан, быв словацькый євангелицькый священик, драматік, публіціста, єден із найвекшых умелцїв войводиньскых Словаків. Homo sapiens є першов частёв ёго задумованой трілоґії. Хотїв нёв доказати незмінность чоловіка як бытя, котре є овладане голодом і сексуалностёв.
Пєса одогравать ся на переломі палеоліту і неоліту. Важну роль в ній має ґесто, міміка, рух, світловы і звуковы ефекты. Но пєса із 1924-го року была лем іншпіраціёв про інсценаторів у пряшівскім Театрї Александра Духновіча. Публіка ся може тїшыти на цалком нове оброблїня темы, котре рефлектує і сучасность.
„ВГВ ня іншпіровав думков інсценовати театер в правіку. Посмотрити ся на чоловіка і людьску сполочность з погляду їй коріня, так як выникала і існовала векшыну людьской історії. Модерна історія творить лем їй маленьку часть і окрeм реквізіт, костімів і мас кличучіх по рівности не приность нич прінціпіално нове,“ говорить режісер Антон Коренчі.
„Централныма темами про мене были насилство, механізм агнеця, міфы, але і гумор. Зато собі думам, же публіка ся не мусить бояти споминаных важных тем, намагали сьме ся то зробити скорїше комічно і на кінцю так дакус выразити ся і ку сучасности,“ продовжує далше про нашу редакцію Коренчі.
В новій пєсі Познатый непознатый (Homo sapiens), котра буде мати премєру на Великій сцені в пятніцю о 19.00 год., буде мож відїти вшыткы ґенерації акторів театру – Василя Русиняка, Осифа Ткача, Осифа Пантликаша, Мартіна Оравца, Владиміра Рогача, Людмилу Лукачікову, Владиміру Брегову, Зденку Кваскову і Івету Фейкову.
Антон Коренчі
Режісер Антон Коренчі (1986 р.) сполупрацує з Театром Александра Духновіча по першый раз. Выштудовав театралну режію на Высокій школї музичных умень в Братїславі, де пізнїше робив і педаґоґа як асістент.
Ёго мено є повязане з вецеро інсценаціями, котры робив про Театер a.гa (Divadlo a.ha). Далше продовжовав і в Театрї Мала сцена СТУ (Divadlo Malá scnéna STU), ці в Словацькім народнім театрї (Slovenské národné divadlo). Сполупрацовав і з Словацькым розгласом (Slovenský rozhlas), Штатным театром Кошіцї (Štátne divadlo Košice) ці Братїславскым ляльковым театром (Bratislavské bábkové divadlo). Довєдна режіровав 24 професіоналных пєс, за веце із них здобыв премію од Літературного фонду (Literárny fond).
В роцї 2017 засновав обчаньске здружіня АнтіТеатро (AntiTeatro), незалежну платформу про професіоналне перформатівне уменя, в рамках котрого хоче занимати ся баданём і експеріментами в области перформатівного уменя.
Петро МЕДВІДЬ, ЛЕМ.фм, выміна фотоґрафії: А. З.
