15. 8. 2024: Посвятили обновлены войновы цінтерї в Репейові і Янківцях

Обновлены цінтерї з Першой світовой войны в селї Репеїв в окресї Меджілабірцї і селї Янкiвцї, Гуменьского окресу, у віторок, 13-го авґуста 2024-го року святочно посвятили.

Цінтерї перешли обновов од 2023-го року, на обидвох были збудованы новы памятникы, на котрых суть і мена похованых вояків. Як повів про аґентуру TASR председа Клубу воєньской історії Бескіды Мартін Дробняк, посвячіня приправили у сполупраці із селами Янківцї, Репеїв і Нижня Полянка, Бардейовского окресу.

В рамках обновы робили і баданя

„Посвячінём цінтерїв мы днесь оддали почливость ту похованым воякам, котры в области загынули при тяжкых боях почас Першой світовой войны, котра почала перед 110-ма роками,“ повів Дробняк.

Іде о малы войновы цінтерї, котры суть частями цівілных сільскых цінтерів. Спискы вояків обробили історіци із Клубу воєньской історії Бескіды. Баданя імен было частёв проєкту обновы тых пєтных місць.

„На памятниках робили ремеселници і добровольници влони на умелецько-ремеселнім пленері, котрый быв частёв черезгранічного словацько-польского проєкту в рамках проґраму Interreg,“ повів староста Нижнёй Полянкы Ян Цундра.

На войновім цінтерї в селї Репеїв є похованых 46 вояків австро-угорьской армады в масовій шахтї. Вояци вмерли у фебруарі і марцї 1915-го року. Гроб локалізовали у 2022-ім роцї і выбудовали централный памятник із списком похованых.

„Посвячіня войновых цінтерїв было реалізоване в тїсній сполупраці із Озброєныма силами Словацькой републікы,“ додав председа КВГ Бескіды Дробняк.

Клуб робить дале

Як інформовав Клуб воєньской історії Бескіды на своїх соціалных сітях, добровольници робили і дале почас послїднёго вікенду. Тот раз в селї Вырава, Меджілабірьского окресу, де находять ся три войновы цінтерї, на якых похованых є понад 3 500 вояків, котры впали в роках 1914 і 1915.

Тоты місця похованя находять ся на бывшім боёвім полю, часто лем дакілько метрів од окоповых ліній.

Клуб із Выравов спілупрацує вже од 2008-го року. „Реґуларно помагаме із старанём ся о войновы цінтерї, котры суть над селом. Занимаме ся утримованём пішника, бо о вшытко треба по роках одповідно старати ся. В тім роцї проходить обнова пєтных місць у векшім розсягу,“ інформовав клуб.

Петро МЕДВІДЬ, ЛЕМ.ФМ. Ґрафічна і языкова управа: АРК в СР. Фото: TASR.