15. 8. 2021: Аж до неба
Флаґ мож підняти аж до неба, но главнїшым є, што дїє ся на земли.
Занедовго буде Україна святковати 30-ту рочніцю незалежности. Округла рочніця бы собі заслужыла державу в лїпшій кондіції, но реалность є інша.
Теріторіална цїлость і недїлительность Україны, котра є і у декларації незалежности з 1991-го року, є днесь, нажаль, написана лем на папери. Крим є натеперь анектованый, і далша часть україньской теріторії на выході країны не є під контролёв Кієва, а сепаратістів.
Тота теріторіална цїлость і недїлительность, котру ґарантовали Українї наприклад і Споєны штаты Америкы ці Великобрітанія Будапештьскым меморандумом, днесь уж ани не є темов про западны країны, котры о проблемах односно проблематічных україньскых теріторій лем мовчать і з часу на час продовжать сімболічно санкції. Але робити бізніс з Росіёв, як в припадї Nord Stream 2, никому наперек тому не перешкаджать.
Значіть, не так цалком никому. Українї то перешкоджать, но то є так вшытко. Голос барз підняти не годна, бо од тых хлїбодавцїв є залежна, і радо бы вступила до клубів тых держав. І так ся в бою о свої теріторії нашла по барз короткім часі сама.
Святковати 30-ту рочніцю незалежности бы собі досправды заслужыло лїпшу кондіцію державы. Намісто того ся смотриме, наперек віку, на хвору дїтину, а уж ани адоптівным западным родічам не барз хоче ся лляти грошы на лїчіня до студника, котрый не має в припадї Україны, якбач, дна.
Є смутным, кедь країна мусить святковати округлу рочніцю своёй незалежности в ставі, же на части теріторії проходять бої, а часть теріторії є анектована. Но не мож забывати ани на то, же неправость на своїй теріторії зачала Україна сама, а то такой на початку своёй назалежности.
Тоту неправость зробила і чінить односно єдного корїнного народа і односно єдной цїлой теріторії, котра їй історічно не належала.
При 30-ій рочніцї Україны предці не мож забывати на то, же про Русинів, котры ниґда не діяли проти україньской державы, є то тридцять років неузнаваня, утискованя прав, продуманой асімілації, а нераз і кріміналізації русинства і ёго представителїв.
А так само не мож забывати ани на то, же право переступила Україна уж по референдумі з 1991-го року, коли резултаты того референдума не зреалізовала, і так ся неправость такой на початку не зробила лем односно Русинів, але вшыткых, котры жыли і жыють на історічній русиньскій земли, на Підкарпатю.
Інтересным фактом є, же од крітічного 2014-го року мають предтавителї Закарпатьской области Україны намагу вказовати область веце патріотічнов як цїла Україна. Той Закарпатьской области, котрой право на автономію з референдума было шмарене на землю і потоптане. І тот рік в Ужгородї ставлять ся великый стовп, найвекшый в области, пишуть медії, на котрій буде завішеный україньскый флаґ ку рочніцї незалежности.
Ніч проти підниманя флаґу, і як го хотять мати найвысше в цїлій области, най мають. Але я якось не вірю на такы різны вавілоньскы проєкты, котры хотять досягнути небо.
А не забудьме на то, же флаґ досправды мож, а то будьякый, підняти аж до неба. Но главнїшым є, што ся дїє на земли. Під найвысшым стовпом з флаґом в Закрпатьскій области жыють люде, Русины, котры ся не годны добити своїх прав. Вышку стовпа каждый за пару років забуде. Но тото нїт.
Петро МЕДВІДЬ, статя была написана як коментарь „Вступне до контроли“ лемківского радія lem.fm. Ґрафічна і языкова управа: ред. АРК в СР. Жрідло фотоґрафії: Wikiwand.com.
