15. 8. 2020: Премєр їх забыв спомянути. Фінанції за бой проти пандемії дістануть і гасічі

Одміну за бой проти пандемії коронавірусу дістануть і гасічі. У своїм профілї на соціалній сітї о тім інформовав председа влады СР Іґор Матовіч (OĽaNO).

Премєр у пятніцю, 14. авґуста 2020, на пресконференції повів, же про людей, котры были в першій лінії в бою проти пандемії коронавірусу, штат вычленив 50 міліонів евр.

„Праві єм телефоновав з міністром внутра Романом Мікулцом і припомянув мі, же при роздїлїню одміны 50 міліонів евр говорили сьме і о гасічах і якось вчера єм їх вчера на пресконференції забыв спомянути. Гей, ясно, же ся то буде тыкати і гасічів, котры были насаджены односно КОВІД-19. Тадь, што бы сьме собі почали, наприклад, без гасічів, котры вытрывало тестовали людей в карантенных центрах?“, додав Матовіч.

Люде, котры были в першій лінії в бою проти пандемії коронавірусу, дістануть од штату 50 міліонів евр. Одміна буде роздїлена меджі здравотны сестры, поліцайтів, вояків і працовників домів соціалных служеб. Про доповнїню председы влады і меджі гасічів.

„Резортны міністры бы ся теперь до тыждня мали договорити, комі буде яка фінанчна одмена удїлена. Препокладам, же одміна на єдного працовника бы могла быти меджі 300 аж 500 евр,“ конкретізовав 14. авґуста 2020 премєр.

Script logo