15. 7. 2020: Вмер мукачовскый єпарха Мілан Шашік

У віцї недожытых 68 років вмер у віторок, 14-го юла 2020-го року, во вечурнїх годинах єпарха Мукачовской ґрекокатолицькой єпархії – владыка Мілан Шашік. Інформовав о тім офіціалный сайт єпархії. За непотвердженыма інформаціями мав владыка вмерти на інфаркт.

Монс. Мілан Шашік ся народив 17-го септембра 1952-го року в селї Легота в окресї Нїтра, на Словакії. Од 1971-го до 1976-го року штудовав на Римокатолицькій кірілометодійскій богословскій факултї в Братїславі. Рукоположеный на священика быв 6-го юна 1976-го року. У 1971-ім роцї вступив до Місійной Конґреґації отцїв лазарістів, і в 1973-ім роцї зложыв вічны обіты.

Душпастырьску діялность выконовав наперед як каплан, пізнїше як парох. Із позволїнём Святішого Престола, кедьже ся все інтересовав о восточный обряд, служыв у двох обрядах – візантійскім і латиньскім.

Од 1990-го до 1992-го року штудовав на Папскім теолоґічнім інштітутї Тересіанум в Римі. Од 1992-го до 1998-го року робив на Апостольскій нунціатурї на Українї. Пак быв єден рік директором новіціату Конґреґації отцїв лазарістів на Словакії. В конґреґації мав і далшы функції – провінціалный асістент, директор штуденату. В авґустї в роцї 2000 вернув ся на Україну і быв римокатольцкым парохом в Перечинї.

Папа римскый Іоан Павел ІІ. го 12-го новембра 2002-го року выменовав за апостольского адміністратора ad nutum Sanctae Sedis (дочасного) Мукачовской ґрекокатолицькой єпархії і за тітуларьного єпіскопа бононьского. Єпіскопске рукоположіня прияв од Іоана Павла ІІ. в Базиліцї святого Петра в Римі на Праздник Богоявленія за новым календарём 6-го януара 2003-го року. Єпархію як адміністратор перебрав по владыкови Іоанови Семедіёви.

В слїдуючіх роках консолідовав условія в Мукачовскій ґрекокатолицькій єпархії, основав новы парохії, збудовало ся множество новых храмів. Дня 17-го марца 2010-го року быв Папом римскым Бенедіктом XVI. выменованый за мукачовского єпарху. Вічная память!

Петро МЕДВІДЬ, ЛЕМ.фм, языкова управа: ред. АРК в СР.