15. 7. 2019: „Досправды“ Русиньска ватра буде тот рік знова богатша
В днях 19-го аж 20-го юла 2019-го року одбуде ся юбілейный 10-ый річник Русиньской ватры в Малім Липнику, котрой орґанізаторами суть орґанізація молоды.Русины, Фолклорный ансамбель Рутенія і село Малый Липник.
„Досправды русиньска“ собі дали орґанізаторы як лайтмотів події, бо шторік є проґрам фестівалу чісто русиньскый, што не мож повісти о іншых фестівалах, котры мають в назві придавник „русиньскый“. Навеце тот рік чекать участників розшырїня проґраму і звекшіня фестівалового ареалу.
Новоты на фестівалї
О новотах на юбілейнім річнику фестівалу про нашу редацкію повів Петро Штефаняк, основатель і єден із головных орґанізаторів ватры, яка робить ся на граніцї меджі Словакіёв і Польщов.
„В пятніцю сьме розшырили проґрам о концерт. В попереднїх річниках была на тот день напланована лем школа танця, лекція і забава. Так само сьме звекшыли ареал цїлой події, котрый буде мати оддїлены зоны про супроводный проґрам і проґрам на головній сценї. То ся в практіцї вкаже в суботу, коли є денный проґрам поділеный на головній сценї до трёх блоків, меджі котрыма буде проходити проґрам в далшых зонах фестівалу,“ повів о новотах Штефаняк.
Як далше інформовав, тот рік хотять мати на Русиньскій ватрї векшый напрям на літературу, но не забыли ани на найменшых. „Про діти буде тот рік веце атракцій,“ доповнив орґанізатор. Тогорічнов новотов, котра затля не є планована як правило про далшы річникы, є і то, же літурґія, котров зачінать суботняйшый проґрам буде прямо в ареалї фестівалу.
Штець і Русиньске тріо
На юбілейній ватрї буде мож відїти, наприклад, Столичного джывкы, Верьховину, Тріо Кантар, Барвінок, Фолклорный колектів Горнад ці братіславску Рутенію. Хыбити не будуть ани успішны і штораз веце популарны участници шов словацькой державной телевізії „Zem spieva“ – Штефан Штець і Русиньске тріо.
На сценї буде мож відїти і інтересну фузію двох колектівів – Горнаду і Рутенії. Тоты споять ся в сполочнім танечно-драматічнім проґрамі о оптаціях Русинів із Чехословакії по Другій світовій войнї. Обидва фолклорны колектівы у 2018-ім роцї приготовили на тоту тему свої представлїня – Рутенія проґрам під назвов Земля обіцяна, Горнад проґрам Справы, што ся діють. Фестіваловы навщівници будуть мати можливость відїти фраґменты тых представлїнь в єднім сполочнім приблизно годиновім проґрамі. Комплетный проґрам можете прочітати на плаґатї справа.
10-ту Русиньску ватру в Малім Липнику фінанчно підпорив Фонд на підпрору културы народностных меншын і Фундація Татра банкы.
Петро МЕДВІДЬ, ЛЕМ.фм
