15. 5. 2021: До Полонин мають іти міліоны на розвиток
Міністерство жывотного оточіня Словацькой републікы просадило реалізацію плану розвитку на Мураньскій полонинї, котрый поможе реґіону при ёго трансформації. На пілотны проєкты розвитку мягкого турізму в Народнім парку Мураньска полонина, але і в Народнім парку Полонины, котрый є в русиньскім реґіоні, має іти 16 міліонів евр.
На стрїчі з представителями самосправ, турістічного руху і Лїсів Словацькой републікы о тім в пятніцю, 7-го мая 2021, інформовав державный секретарь резорту жывотного оточіня Михал Кіча. Інформовала о тім аґентура TASR.
Мають ся творити робочі місця
„Проєкты розвитку будуть заміряны на вытворїня робочіх місць, передовшыткым в секторї природного турізму, природї близкого обгосподарёваня лїса і повязаных з тым дїятельством,“ повів Кіча. Фінанції мають іти до тых двох народных парків з плану обновы в рамках кроків на адаптацію реґіонів на зміну клімату.
В планї розвитку є пріорітов мягкый турізм, тот має подля енвірорезорту высшу придану вартость і представлює софістікованїшый і діверзіфікованїшый сектор як інтензівне здобываня дерева, што може помочі сільскым реґіонам забранити вылюднёваню.
„Одкрываме комунікацію о можлных подобах підпоры в слїдуючіх роках так, жебы фінанчны средства ішли до сістематічных і тырвало утримательных змін в охранї природы, до підпоры містной подникательской сферы і інфраштруктуры про навщівників реґіону,“ повів Кіча.
Секретарь быв і в Стащіні
По пятніцёвій стрїчі в Тисовцї Михал Кіча одышов до Стащіна, де бісїдовав о будучности Народного парку Полонины. На стрїчі брали участь представителї самосправы, жупы, Лїсів Словацькой републікы, пріватных маїтелів лїсів, мімовладных орґанізацій і турістічного руху.
Резултатом стрїчі в Стащінї є договор на далшім поступі при творїню выберовой комісії. Тоту будуть творити представителї сіл із цїлём найти рїшіня на підпору турізму в реґіонї.
Державный секретарь собі в Стащінї припомянув і жертвы Другой світовой войны а навщівив і новозрядженый сільскый музей, котрый захоплює історію села включно войновых дїй.
Петро МЕДВІДЬ, ЛЕМ.фм, ґрафічна і языкова управа: ред. АРК в СР. Жрідло фотоґрафії: Štátna ochrana prírody Slovenskej republiky.
