15. 3. 2019: В Меджілабірцях припомянуть собі 1. Світовый конґрес Русинів

Світова рада Русинів вєдно із Русиньсков обродов на Словеньску і містом Меджілабірцї дня 23-го марца 2019-го року орґанізують в Меджілабірцях святочну академію, котров собі припомянеме 28-му річніцю од 1-го Світового конґресу Русинів. Тот проходив у тім містї 22-го і 23-го марца 1991-го року.

На академії бы подля інформацій, котры редакції дав председа Русиньской оброды на Словенську Мартін Караш, мали брати участь представителї Світового конґресу Русинів із векшыны членьскых держав.

 

Коло памятной таблы і на Містьскім урядї

Офіціална часть проґраму зачінать о третїй пополїдне презентаціёв участників. Далше є напланованый сімболічный акт коло памятной таблы, котра є на Културнім домі в Меджілабірцях (будова, в котрій є і Музей модерного уменя Енді Варгола). Якраз то было місце, котре стало сценов того вызначного історічного пункту в русиньскім народнім возроджіню по 1989-ім роцї. На тім місцї має приговорити ся председа Світовой рады Русинів (СРР) Штефан Лявинець, як і єден із участників конґресу із 1991-го року.

Од пів пятой має академія продовжовати в просторах Містьского уряду в Меджілабірцях.Тоту часть буде одкрывати Андрій Копча. З рефератом під назвов Русины світа до участных зверне ся председа СРР Штефан Лявинець, далше буде слово належати пріматорови міста Меджілабірцї Владїславови Вышньовскому, котрый Русинів поздровить своїм приговором. Выступати на академії має і Мартін Караш, підпредседа Світовой рады Русинів і председа Русиньской оброды, котра тот рік орґанізує Світовый конґрес Русинів знова на Словакії.

Участны годны будуть відїти і выставку під назвов Русиньскы діятелї меджівойнового періоду. Нёв закнічіть ся святочна часть, по котрій буде іщі слїдовати засіданя Світовой рады Русинів.

 

 Дата першого конґресу є Світовім днём Русинів 

Днї  22-ый і 23-ій марец 1991-го року записали ся до історії Русинів цїлого світа. 1-ый Світовый конґрес Русинів, котрый проходив у Меджілабірцях, быв подіёв, на котрій ся першыраз зышли Русины з різных країн Европы і Северной Америкы на своїм світовім форумі. У тій новій демократічній сітуації собі Русины наповно усвідомили свою позіцію як єдного із многых европскых славяньскых народів. Вырішуючім у тім процесї возроджованя Русинів было основне властне пересвідчіня, правдива арґументація історічных фактів, потребна порція толеранції і безгранічна терпезливость при здобываню своїх прав.

На 1-ім Світовім конґресї Русинів быв делеґатами за першого председу Світовой рады Русинів зволеный Василь Турок-Гетеш, втогдышній председа Русиньской оброды, котрый на челї СКР стояв цілых десять років.

На остатнїм Світовім конґресї Русинів, котрый проходив од 29-го юна до 2-го юла 2017-го року в хорватьскім Осієку, было вырїшено, же 23-ій марец буде шторік святковати ся як Світовый день Русинів.

Петро МЕДВІДЬ, лем.фм