15. 12. 2018: Вітязом літературного конкурзу – Юрко Харитун

В пятніцю, 14-го децембра 2018-го року, в Пряшові одбыло ся выголошіня найлїпшых творів Літературного конкурзу Марії Мальцовской і презентація оцїненых творів.

Конкурз вже 5-ый раз выголосив Сполок русиньскых писателїв Словеньска в сполупрацї з Академіёв русиньской културы в Словацькій републіцї і Інштітутом русиньского языка і културы Пряшівской універзіты в Пряшові, в котрого просторах святочна подія проходила.

 

Приголосило ся вісем писателїв

До літературного конкурзу шторік можуть приголосити ся авторы, котры пишуть по русиньскы і котры суть обчанами Словацькой републікы. Загнати мож лем творы, котры дотеперь не были іщі публікованы.

Тот рік до конкурзу приголосило ся вісем авторів. Одборна порота, котра была в складї: Міхал Павліч – председа пороты, Кветослава Копорова і Міхала Голубкова, оцїнёвала як поетічны, так і прозовы творы. Наконець журї выголосила першы три місця.

 

Вітязом є Юрко Харитун

„Третє місце здобыв Осиф Кудзей за свої байкы з капков сполоченьской крітікы. Порота оцїнила їх гумор і рітмічне оброблїня,“ повів про радіо Русин. ФМ председа поротыі Міхал Павліч.

На другім місцї в 5-ім рочнику Літературного конкурзу Марії Мальцовской скінчіла Людмила Шандалова, авторка поезії, прозы і театралных сценарів про дїти. Тот рік запоїла ся до конкурзу з лірічныма творами.

На першім місцї скінчів і цїлковым вітязом конкурзу став Юрко Харитун, русиньскый поет, котрый є майстром свого ремесла на професіоналній уровни. „Порота оцїнила многозначность і оброблїня стихів, котры мож задїлити до рефлексівной і духовной лірікы,“ інформовав Павліч.

Найлїпшы творы будуть публікованы в часописї Русин, котрый має у каждім выданю свій літературный додаток під назвов Поздравлїня Русинів. (Позн. АРК в СР: таксамо будуть публікованы і в новій рубріцї Література на вебовій сторінцї Академія русиньской културы в СР.)

Петро МЕДВІДЬ, лем.фм

Script logo