15. 10. 2021: Юрко ХАРИТУН: Здоганям час, Ябко, Голос косы (Стишкы)

Юрко Харитун

 

ЗДОГАНЯМ ЧАС

Довга зима

довгы ночі вечуры

цверны на клубяти

а я сиджу коло стола

білый папірь

перо в руцї

як не записати

што ня коле в очі

Прийде час

в думках загынуть

розсыплють ся

як хыжа із глины

Прибігне ярь

прискаче лїто

в тім часі мало часу

не пишу

а лїтам

Часом сяду на коня

і тот час здоганям

 

ЯБКО

Упаджене ябко у траві

червене

зрїле

може і черваве

Із хробаків не маю страх

надгрызую сміло

І я тебе таку нашов

і не грыз а цїловав

ты моє глядило

Огрызок ябка не одшмарю

дам хробакам

а тебе притулю

 

ГОЛОС КОСЫ

То не жовны в конарях

не ку-кук зозулї

десь на луцї

під ялицёв

клеплють косы

косцї

Коса

бабка

молоток

О якы чудесны звукы

як в орхестрї бубнарів

Потїшыли мої уха

І їх вложу до рядків

Остру косу

гладку бабку

а молоток бубнаря

 

(З приправлёваной книжкы Юрка Харитуна – Надгорїты мої днї.)