14. 9. 2022: Конкурс за знїманє промотивного видеа з нагоди попису жительства

Роботне цело за младих Националного совиту Руснацох розписало Конкурс за знїманє промотивного видеа зоз цильом промоциї важносци попису жительства 2022. року.

Поволани шицки млади з рускей заєднїци (од 15 по 35 роки) же би направели кратки видео знїмки у тирваню од максимално минути, дзе на креативни и цикави способ потолкую чом важне вияшнїц ше як Руснак, або Рускиня на тогорочним попису жительства.

Видео знїмки мож направиц з мобилним телефоном, фотоапаратом, або видео камеру, а треба водзиц рахунку о квалитету самого знїмка, як и о змистох през котри млади жадаю виражиц свойо думаня и становиска. Важне же би на знїмку ясно було видно и чуц цо ше жада указац, або повесц.

Видео знїмки мож посилац на имейл адресу: rcmladez@gmail.com

Конкурс отворени од 12. по 26. септембер, а три найлєпши знїмки буду пенєжно наградзени.

М. ЗАЗУЛЯК ГАРДИ, Рутенпрес

(Публікуєме в оріґіналї – войводиньскім варіантї русиньского языка.)