14. 9. 2022: В Осаднім посвятили церьков по реконштрукції інтерьєру

Як інформовав Петро Сорока, православный священик із Осадного, Сниньского окресу, в суботу, 10-го септембра 2022-го року, одбыло ся посвячіня Церькви Вознесенія Господня, котра перешла великов реконштрукціёв інтерьєру.

В Осаднім остатнїй раз служыли ся боголсужіня 5-го юна того року на храмовый праздник – одпуст. Церьков у Осаднім є народнов културнов памятков і реконштруцкія, котра проходила три місяцї, была реалізована із згодов а допереду становленым поступом робот з боку Памяткового уряду в Пряшові.

Окрем інтерьєровых стїн храму была зроблена і нова електрифікація, централне грїтя, репасованый быв історічный лустер, купив ся новый лустер до олтарьной части, як і новы лампы на стїну. Обновило ся і озвучіня церькви.

„Оправу інтерьєру підпорили сумов 23 800 евр посланцї Пряшівского самосправного краю в рамках проєкту Реновація інтерьєровых стїн православного храму в Осаднім,“ інформовав Сорока з тым, же на реконштрукцію пожертвовали і многы далшы дарцёве.

Церьков по реконштруцкії посвятив архідекан про окресы Снина і Гуменне прот. Іґор Кереканіч, главным служытелём літурґії, котра пак слїдовала, быв містный декан прот. Борис Грустіч, з котрым окрем спомянутого декана Кереканіча служыли прот. Петро Сорока і прот. Маріян Коваль.

По святій літурґії отець Сорока подяковав присутнїм духовным і віруючім за участь на тій торжественній події, познакомив їх з роботами і прочітав довгый список донорів, котры пожертвовали на реконштрукцію. Так само высловив пересвідчіня, же в близкій будучности подарить ся оправити і екстерьєр церькви а окрасити єй новов мальбов на стїнах.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.