14. 9. 2020: Кошыцька єпархія має вікарів про Мадярів, Русинів і Українцїв

В суботу, 12-го септембра 2020-го року, в предвечур одпусту в ґрекокатолицькім Катедралнім соборї Рождества Пресвятой Богородіцї, были призначены двоми новы сінкелы – єпіскопскы вікарї. Почас малого входу прияли од владыкы Кіріла Василя, адміністратора Кошыцькой ґрекокатолицькой єпархії, златы кресты з окрашінём як знакы свого уряду.

Кошыцька єпархія має од суботы вікаря про мадярьскых віруючіх, і вікарія про русиньскых і україньскых віруючіх. Інформовав о тім Пресовый центер Кошыцькой єпархії.

Вікаром про Мадярів став ТгДр. Войтєх Богач, ПгД. мол., котрый є і духовным адміністратором мадярьскых віруючіх в Кошыцях. За вікарія про русиньскых і україньскых віруючіх єпархії быв призначеный єромонах Кассіан Каміл Дрозд, котрый є адміністратором парохії Гелцманівці і актуарьом Єпархіалного уряду.

„Кошыцька єпархія і главно їй центер, місто Кошіцї, в остатнїх роках стає цїлём міґрації многых молодых людей. Кедьже Кошіцї понукають достаток робочіх і економічных принагод, кошыцькым ґрекокатолицькым єпіскопам залежыть, жебы і тоты ґрупы віруючіх мали постарано о основны духовны потребы. В остатнїх роках ся зінтензівнює душпастырьскый інтерес о по мадярьскы і по русиньскы бісїдуючіх ґрекокатоликів. Окремый душпастырьскый інтерес выжадують і великы ґрупы по україньскы бісїдуючіх віруючіх візантійского обряду, котры приходять за роботов або штудовати на выходну Словакію,“ інформовав Пресовый центер Кошыцькой єпархії.

Єромонах Кассіан Каміл Дрозд, котрый став вікаром про Русинів і про Українцїв, має русиньске походжіня, і є з Меджілаборець. Штудовав на Ґрекокатолицькій богословскій факултї Пряшівской універзіты в Пряшові, пак одышов докінчіти теолоґічны штудії на Восточну колеґію в нїмецькім Айхштетї. Рукоположеный на священика быв у 2009-ім роцї. В роцї 2016 прияв монашескый постриг з рук кошыцького єпархы Мілана Хаутура.

Петро МЕДВІДЬ, лем.фм, языкова управа: ред. АРК в СР.

Script logo