14. 9. 2018: Засіданя соймовой комісиі в лемківскых справах

11. вересня/септембра 2018 р., в салях Сойму Польской Республикы в столичным місті Варшава, одбыло ся засіданя соймовой Комісиі Нацийональных і Етнічных Меншын. Засіданя было цілістю присвячене лемківскым справам.

Посеред можливых тем, якы могли бы быти омовлены, явили ся дві:

1. Розсмотріня Інформациі Міністра Внутрішніх Справ і Адміністрациі на тему ситуациі і проблемів лемківской меншыны в Польщы.
2. Розсмотріня Інформациі Міністра Народовой Едукациі на тему лемківской освіты в Польщы.

Першу з тем реферувала заступничка директора Департаменту Віроісповідань та Нацийональных і Етнічных Меншын в МВСіА, Тереса Карчмарек, а другу – директорка Департаменту Загальной Просвіты в МЕН, Катажына Кошевска. В короткых справописах были представлены в загальным виді справы лемківской меншыны з пункту пізріня офіцияльных даных.

На засіданю, котре вела ведуча Комісиі Нацийональных і Етнічных Меншын, посланка Сойму Польской Республикы – Данута Пєтрашевска, были тіж присутны репрезентанты найважнійшых лемківскых орґанізаций в Польщы – ведучий Стоваришыня Руска Бурса, Демко Трохановскій, а од імене Стоваришыня Лемків – Марта Ватраль. Лемківскы представникы пояснили в парляменті, што посеред вельох добрых примірів підтримуваня лемківской етнічной меншыны польском державом, днес Русины в Польщы змагают ся м.ін. з перманентном украінізацийом, на котру не все реаґуют державны урядникы ріжных щаблів, што єст незаконне, смотрячы на обовязуючу Уставу о нацийональных і етнічных меншынах та реґіональным языку з 6. січня/януара 2005 рока.

Хоц пропонуваны комісийом пункты засіданя тыкали лем проблемів лемківской етнічной меншыны в Польщы, дальшы орґанізациі, менуючы ся лемківскыма, не были присутны на засіданю, не было тіж жадного з двох репрезентантів лемківской меншыны в Спільній Комісиі Уряду та Нацийональных і Етнічных Меншын.

Петро ТРОХАНОВСКЫЙ