14. 8. 2021: Леґендарна банька Campbell’s по 50 роках дождала ся одсвіжыня

Кінцьом липця леґендарна поливка Campbell’s вказала нову баньку. Марку розславил Енді Варголь серийом ґрафік «Банькы з поливком фірмы Campbell’s». Фірма рішыла одсвіжыти дізайн.

Артиста зробил своі образы в 1962 році. Складают ся на них тридцент два полотна, кажде о вымірах 51 х 41 цм, котры представляют баньку з поливком фірмы Campbell’s во вшыткых доступных в тамтым часі смаках.

Через пятдесят років дізайн маркы Campbell’s оставал такой же незміненый. Тепер лоґо і етикєты баньок были перепроєктуваны. Одсіжыли поєдны елементы, дакус іх попереставляли. Найвекшом зміном єст тото, што долов банькы помістили ґрафіку вказуючу головны складникы поливкы. Продукты фірмы Campbell’s продаваны сут в 120 державах світа.

То Варголь спричынил ся ґу тому, што марка Campbell’s вошла до попкультуры. Тепер же фірма тото хоснує. Вєдно з ребрандінґом, Campbell’s ввюл до продажы лімітуваный артистичный токен (NFT). Запроєктувана через Sophie Chang ілюстрация была выставлена на продаж в чыслі 100 штук. Выпродалa ся одраз.

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)

Script logo