14. 8. 2019: Патріархови Юссефови (Абсі) удїлили злату медайлу Пряшівской універзіты

Як інформовав Інформачный центер Пряшівского архієпіскоства, на запрошіня пряшівского ґрекокатолицького архієпіскопа і метрополіты Словакії Іоана (Бабяка), зачатком авґуста 2019-го року завітав на Словакію на сімднёву навщіву Ёго Блаженость Юссеф (Абсі), мелхітьскый ґрекокатолицькый патріарха Антіохії і цїлого Востока, Єрусалима і Александрії.

У пятніцю, 2-го авґуста 2019, в допроводї нашого метрополіты срїтив ся патріарха в Братїславі із представителями Словацькой републікы, пак навщівив Апостольску нунціатуру на Словакії.

 

Медайла од Пряшівской універзіты

3-го і 4-го быв патріарха участный на архієпархіалнім одпустї, котрый проходив на Горї Звір в русиньскім селї Літманова. Вєдно із нашым метрополітом одслужыв вечерню літурґію в суботу, в неділю на торжественній одпустовій архієрейскій літурґії мав проповідь.

В понедільок, 5-го авґуста, ся Ёго Блаженость стрїтив у Пряшові з представителями містной і реґіоналной самосправы. В тот самый день му в просторах Ґрекокатолицькой теолоґічной факулты Пряшівской універзіты ректор Петер Коня удїлив золоту медайло Пряшівской універзіты в Пряшові. Тото оцїнїня было патріархови удїлене на пропозіцію декана Ґрекокатолицькой теолоґічной факулты Петра Штурака за проглублїня меджінародной акцептації і меджінародной сполупрацїі меджі Конґреґаціёв про восточны церькви і Пряшівской універзітов.

 

Друга найвекша католицька церьков візантійской традіції

Ёго Блаженость Юссеф быв выбратый за патріарху 21-го юна 2017-го року, місяць по тім як Папа римскый Франціск прияв резіґнацію Ґриґорія ІІІ. (Лагама), котрый быв на Словакії веце раз. Про Патріарху Юссефа то была перша навщіва нашой країны.

Мелхітьска ґрекокатолицька церьков є частёв Католицькой церькви і належыть меджі 23 восточных церьквей, подобно як Ґрекокатолицька метрополітна церьков sui iuris (свого права) на Словакії. Подля кількости вірників, котрых має приблизно 1,6 міліона, є четвертвов найвекшов восточнов церьквов і спомеджі церьквей, котры походять із візантійской традіції, є по Україньскій ґрекокатолицькій церькви другов найвекшов. Україньска ґрекокатолицька церьков має статус лем верьхнього архієпіскопства, не патріархату.

Патріарха урядує в Дамашку, в Сірії, де проходить остатнї рокы обчаньска война. Много храмів было знищеных, ёго вірны зажывають тяжкы часы. Церьков выникла оддїлїнём ся од Ґрецького православного патріархату в Антіохії в роцї 1729, коли быв Кіріл VI. признаный Папом римскым за католицького патріарху Антіохії.

Петро МЕДВІДЬ, ЛЕМ.фм, здрой фотоґрафій: grkatpo.sk